VIDEO Nunap sajunnera tassaarsuaqartitsisoq
Politiit naapertorlugit Illorsuarni Nuugaatsiamilu qarsutsinerit nunap sajussimaneranik pissuteqarput.
GEUS-ip KNR-imut mailikkut ilisimatitsissutigaa Nuugaatsiap avannaatungaani kilometerinik 28-nik ungasitsigisumi ippassaq unnukkut nalunaaqutaq aqqarngup missaani richterskalamik uuttorlugu 4.1-imik sakkortutigisumik nuna sajussimasoq.
Nunap sajoqqissinnaanera pissutigalugu Uummannap kangerluaniittut politiinit kajumissaarneqarput sissameeqqunagit.
Nilliasaatit kalerriippata qutsissumukarit
Uummannarmiut Illorsuarmiullu qaqqamut majuarsimasut angerlarsimaffimminnut utersinnaasut politiinit siusinnerusukkut ilisimatitsissutigineqarpoq. Nilliasaatilli kalerrisaarissappata qaqqamut erngertumik majuaqqittoqassaaq.
Upalungaarsimaniarnermut oqartussat oqarasuaammik ilaqutaasut sianerfigisinnaasaannik aamma pilersitsisimapput. Ilaqutaasut qanigisaasullu ernumassuteqartut apeqqutissaqartullu tassunga sianersinnaapput. Oqarasuaatip normoraa 365249.
Assiuteqarpit imaluunniit videoteqarpit? Taava uunga attaveqarfigisigut: webredaktion@knr.gl
