Nunap sajorujussuarnera pissutigalugu Cubami Miamimilu qimagussuisoqartoq
Caribiami immap naqqani nuna sakkortuumik sajummat tamanna Jamaicami, Cubami, Caymanip qeqertaanni Floridamilu Miamimi malugineqarpoq.
Nutaarsiassaqartitsivik Reuters taama allaaserisaqarpoq.
Nunap sajunnera Richterip nunap sajuttarneranik uuttuutaa naapertorlugu 7,7-imik sajuppoq, Jamaicallu sineriaanit avannaq-kippasimmut 125 kilometerinik ungasitsigisumi nunatta nalunaaqutaa naapertorlugu ippassaq ualikkut nalunaaqutaq sisamat missaanni sajuppoq.
Aqqunartitertoqarsimaneranik aseruatitertoqarsimanerinillu suli nalunaaruteqartoqanngilaq.
AAMMA ATUARUK Naalagaaffiit Peqatigiit: Ukioq 2019 nunarsuup kiannerpaaffiata tulleraa
Cubap illoqarfiisa pingaarnersaanni Havanami illut arlallit nakkaattoorsinnaanerat aarleqqutigineqarmat inuit tamaani qimagussorneqarput. Nutaarsiassaqartitsivik AFP taama allaaserisaqarpoq.
USA-milu illoqarfissuarmi Miamimi innuttaasut ilaat najukkaminnit aamma qimagussorneqartariaqarsimapput.
Jamaicami aviisit ilaata The Observerip allaaserisaa naapertorlugu nunap sajunnera nuna tamakkingajallugu malugineqarsinnaasimavoq.
Jamaicami, Cubami Caymanip qeqertaanni, Mexicomi, Belizemi Hondurasimilu tassaarsuaqarsinnaanissaa aarlerisaarutigineqaraluarpoq, aarlerisaarutilli kingorna taamaatiinnarneqarlutik.