Namminersorneq pillugu isumalioqatigiissitap suleqatigiissitaliaani ilaasortat tamangajammik isumaqatigiillutik innassuteqarnermikkut pisuussutinik uumaatsunik Nunatsinni qalluisoqartarnissaanut iluanaarutaajumaartartussat ilanngarterneqaratik nunatsinnut tutsinneqartalissasut innersuussutigaat. Dansk Folkeparti-meersup, Søren Espersen-ip kisimi tamanna isumaqataaffiginngilaa. Ataatsimiititaliap siulittaasua, Frank Jensen, nuannaaqaaq;
Nuannaarutigisorujussuuvara januaar-ip 31-ianni saqqummiussaq taama tapersersorneqartigimmat.
Suleqatigiissitamilu inassuteqaatip Dansk Folkeparti eqqaassanngikkaanni tapersorluarneqarnera april-ip 18-ianni ataatsimeeqqinnissatsinni isumalluarfigalugu.
- Namminersorneq pillugu isumalioqatigiissitaq aqqutigalugu inassuteqaat ingerlaqqissanersoq aperineqarluni Frank Jensen, nangippoq;
Ataatsimiitsitaliami anguniarsimavara Kalaallit Nunaata namminiilivinnissaanut tunngatillugu ikaarsaariarnissami tapiissutit ataatsimoortut ilanngarterneqaratik ingerlaannassasut.
Kisiannili soorlu aatsitassarsiornikkut annertuumik nassaartoqarluni aammalu uuliamik annertuumik nassaartoqassagaluarpat taakkualu arlaat annertuumik iluanaarutigineqalerluni taava soorunami tapiissutinik ataatsimoortunik tunniussisarneq iluanaarutit malillugit ilanngarteriffigineqartariaqassaaq.
- Tapiissutit ataatsimoortut siunissami atorunnaarsinneqarsinnaanerannut aperineqarluni akivoq;
Soorunami neriuutigeqaarput siunissami tapiissutit ataatsimoortut atorunnaarsinneqarumaartut, soorlu Kalaallit Nunaanni ima aatsitassaqartigaluni imaluunniit uuliaqartigaluni namminiilivittoqarsin-naalluni taamanikkussamullu suleqatigiissitami Danmark-ip Kalaallit Nunaatalu akornanni naalagaaffeqatigiinnermi apeqqutit assigiinngitsut nalilersorneqarumaarput, soorlu; naalagaaffeqatigiinnermut tunngasut, inatsisit tunngaviusut, kunngikkormiut, illersornissaq, nunanullu allanut tunngasutigut politikki taamanikkussamut nalilersorneqarumaarput qanoq aaqqivigineqarumaarnersut. Taamanikkussamummi oqartoqarpat namminiilivikkusuttoqarluni taava allatut ajornassaaq imminut napatissinnaalersut akueriinnartariaqassapput.
