Nunap inuiisa nunatsinni ataatsimiinnerat
Nunat inoqqaavi Permanent forummimi ilaasortaasut ulluni makkunani Nuummi naapipput.
Ilaasortaasunit nunatta malugineqarnissaa pingaartuusoq, nunarput sinnerlugu ICC-mi aallartitaq Aqqaluk Lynge oqarpoq.
-Taamatut ataatsimiisitsinermi tusarniaanermi siunertarineqarpoq nunarsuarmioqatigut nunap inoqqaavi naalakkersuisuminnut aammalu kattuffissuarnut aammalu FN-ip suleqatigiiffiini assigiinngitsorpassuarni qanoq ililluni sunniuteqarnerusinnaanerat. Tassalu uatsinnut tunngasunik aalajangersaasoqaraangat, tassalu ullut tamaasa taamaliortoqartarpoq uatsinnut sunniuteqartartunik, taamaattumik tamakkua qanoq ilillugit sunnerniarsinnaavagut? Aammalu maaniinnerannut Kalaallit Nunaanniinnerannut peqqutaavoq takutilaarusukkatsigu nunatsinni Namminersornerulluni Oqartussaaneq qanoq aaqqissuunneqarsimanersoq. Soorunalimi taakkununnga oqarsinnaanngilagut imatut aaqqissuussissuusi, kisianni takutissinnaavarput immaqalu ilinniarfigisinnaavaat qanoq ililluni taamatut suleqatigiinnermi pilersitsisoqarsinnaasoq. Soorunami uagut oqaluttuarisaanerput nunasiaasimanerpullu aamma allarluinnaammat allat ilaarluta qanoq iliuuseqarsinnaanngillat, kisianni tamatsinnut iluaqutaasumik siunnersueqatigiissinnaavugut. Taavalu avatitsinni aamma nunarput ilisaritinnissaat uani aamma siunertatta sallerpaattaasa ilagaat, tassami avataani ilisimaneqarutta tapersersortigut illersortissallugu taamaalillugit qanilliartorsinnaavagut, Aqqaluk Lynge oqarpoq.
Taanna nangilluni nassuiaavoq nunap inoqqaavi misilittakkaminnik imminnut tunniussivigeqatigiissimasut. oqaluttuarporlu nunatsinneersutut ullaaq manna assersuutitut saqqummiussimagitsik issittumi naalakkersuisutigoortumik suleqatigiinneq Arctic Council.
Aqqaluk Lynge aperaarput, unnugu taamaatissammata qanoq maannamut angusaqarsimanertik maluginiarsimaneraa.
- Sallerpaartut una siunertarisimasarput tassaasoq Kalaallit Nunaata inuttaasalu qanoq inuunerannik aamma takutitsilaarnerput, aammalu maani avatangiisigut tamaasa takuaat. Puigunngisaannagassaminnik maani misigisaqarunik taava taanna kalaallinut aammalu issittormiut peqatigiinnerannut annertuumik sunniuteqarsinnaavoq, Aqqaluk Lynge oqarpoq.
Nunap inoqqaavi inuit 70-t missaanniittut nunanit assigiinngitsunit 30-neersut Nuummiipput.
Aqqaluk Lyngep pingaartutut aamma eqqaavaa ukiuni aggersuni FN-p suleqatigiiffii 200-t missaani amerlassusilinnik ilaasortallit Permanent forummimiit sunniuteqaqataaffiginissaat pingaartikkitsik.
