Nunap inuiinik illersuisoq Nobelip eqqissineq pillugu nersornaasiuttagaanut piukkunneqartoq
Norgemi Stortingimut ilaasortap, Torgeir Knag Fylkesnesip, Anayamik FN-illu Nunap Inuiisa ataavartumik Ataatsimiititaliaannik innersuussisuuvoq.
– Nunarsuarmi nunap inuii atugarliortinneqarput. Inuunerminni tunngavigisaat silap pissusiisa allanngoriartornerinit pinngortitallu pisuussutaanik atuinermit annertusigaluttuinnartumit ulorianartorsiortinneqarput. Nunap inuii nunat tamalaat politikkikkut isummersoqatigiittarfiisa oqallittarfiisalu sivisoorsuarmik avataaniitinneqarsimapput, namminnerli sulissuteqarnermikkut ikiorteqarluarnermikkullu Naalagaaffiit Peqatigiit iluanni namminerisaminnik ataavartumik ataatsimiititaliaqalersimapput, Torgeir Knag Fylkesnes NRK naapertorlugu taama allappoq.
Jim Anaya, Canadami indianerit inuillu siorna tikeraarpai, taakkununngalu atugassarititaasut kingorna isornartorsiorlugit.
Nobelip nersornaasiuttagaanik pissarsisussat oktobarip qaammataani nalunaarutigineqartarput decembarimillu tunineqartarlutik. Nobelip ataatsimiititaliaa peqatigalugu nersornaasiisartut ilaatigut tassaapput politikerit, ministerit, professorit, eqqartuussisut nersornaasigaasimasullu.
