Nunap inuii: Silaannaap kissakkiartornera iliuuseqarfigineqarli

Silaannap kissakkiartornera Europami iliuuseqarfigisariaqalersoq nunap inuiisa Issittumi Siunnersuisoqatigiit Københavnimi ataatsimiinneranni oqariartuutigaat.

Issittumi nunap inoqqaavisa aqutsisuisa naalagaaffinnut killernut qangali oqariartuutaat, tassalu nunarsuarmi silaannaap kissatsikkaluttuinnarnerata ilutigisaanik avatangiisit allanngoriartupiloornerat, maanna Europami oqallisaaleruttorpoq.

Aarlerisaarutaavoq ukiut 50-it tulliuttut ingerlaneranni Europap qeqqani naalagaaffiit silaannaap allanngornerata kinguneranik qimarnguittut atorneqalernissaat.

Taama erseqqitsigisumik nalunaarpoq EU-p pinngortitalerinermut immikkoortortaqarfiani, EEA-mi, pisortaq Jacqueline McGlade. Taassuma aarleqqutiginerarpaa ukiuni aggersuni avannaarsuani issittumiit Akullersuup nunataani najugallit Europamut qimarratilernissaat.

Taamatut aarleqquteqartoq taannaannaanngilaq.

-Imaassinnaavoq silaannaap gradinik pingasunik kissarnerulernera oqorsarnikinnerulernikkut taamaallaat anigorneqarsinnaasutut isumaqarfigineqartoq, Clive Tesar, Issittumi Nunap Inoqqaavisa Allattoqarfianni pisortaq oqarpoq nangipporlu:

-Tre gradinik kiannerulernera sunut tamanut sunniuteqarpoq – uumasut, naasut inuillu pinngortitamiittut tamavimmik tamanna sungiunniagassaat.

Nunap inoqqaavisa sinniisaannit ataatsimiinnermi Europami naalagaaffiit sinniisuinut eqqaamaqquneqartoq tassaavoq imminut qiviartariaqalerneq.

-Nunarsuatsinni naalagaaffiit ataasiakkaat qinnuigaavut misissoqqullugu silaannaap allanngoriartupiloornera unikaallatsinniarlugu iliuuseqavinnersut, Larisa Abryutina, Ruslandimi nunap inoqqaavi sinnerlugu taama oqarpoq.

Nunap inoqqaavisa sinniisaat maanna Europami paasisitsiniaallutik angalaarput.

Issittormiut akornanni inuiaat assigiinngitsut 30-t sinniisaat peqatigalugit Larisa Abryutina Europami maanna angalaaqataavoq, silaannaap allanngoriartupiloornerata kinguneri oqariartuutigalugit.