Nunap inuii Norgemi ataatsimiilersut
Piareersaatit nunat immikkoortukkuutaarlugit ingerlanneqarput, issittormiut immikkoorlutik Inuit Saamillu soqutigisaat sammineqarlutik.
Hjalmar Dahl, Aasianneersoq, issittormiut piareersaateqarnerannut siuttuuvoq. Piareersaatitut ataatsimiinnerit marluk ingerlanneqareersimapput, Finlandimi siorna Nuummilu oktobarip qaammataani. Ataatsimiinnerit taakku nunap inuiisa nunat tamalaaneersut Norgemi illoqarfimmi Altami juunip qulinganit aqqaneq aappaanut ataatsimiinnissaannut piareersaataasimapput.
Altami ataatsimiinnermi nunarsuarmit tamarmit peqataasut 600-t sinnissavaat; Norgemullu tikeralereersimapput. Kalaallit Nunaannit, Canadamit, Alaskamit Chukotkamiillu Inuit peqataatitaqassapput.
Altami ataatsimiinneq Saamit Inatsisartuinit nunat naalakkersuisuinillu allanit aningaasaateqarfinniillu aningaasalersugaavoq; Nunat Inuiisa atugaat pillugit Naalagaaffiit Peqatigiit 2014-imi ataatsimeersuartitsinissaat sioqqullugu ataatsimiinnerit annersaralugulu pingaaruteqarnersaassaaq.
Nunat Inuiisa atugaat pillugit Naalagaaffiit Peqatigiit Ataatsimiititaliaani Ataavartumi ataatsimiinnermi naammassineqaqqammersumi, Hjalmar Dahlip issittormiut piareersaataannik saqqummiivoq.
Hjalmar Dahl radioaviisimut oqarpoq ataatsimiinnerit taakkua siunertarigaat, inuiaat issittormiut tamakkiisumik sinniisuutitaqarnissaat, aammalu inuiaat issittormiut isumaasa Naalagaaffiit Peqatigiit 2014-imi ataatsimeersuartitsinissaanni ilanngunneqarnissaasa qulakkeernqarnissaat.
