Nunap inuii isumaqatigiinniarnernut peqataaqquneqarput

Naalagaaffiit Peqatigiit sila pillugu ataatsimeersuarneranni Kalaallit Nunaat ataasinngormat peqataatitaqanngilaq. Inuilli issittormiut peqataatitaqarput, ICC-p præsidentia Patricia Cochran nunap inuii sinnerlugit oqalugiartussatut FN-p qullersaata Ban Ki-moon-ip aggersarsimammagu.

Patricia Cochranip Naalagaaffiit 80-it qullersaannut New Yorkimi oqalugiarnermini ujartorpaa, silap allanngoriartornerata nunap inuiinut sunniutai pillugit nutaamik isumaqatigiissusiornernut nunap inuiisa peqataatinneqalernissaat.

Nunat tamalaat silaannarmik mingutsitsinnginnissamik Kyotomi isumaqatigiissutaanni, silap allanngoriartorneranit nunap inuiisa avatangiisaasa ulluinnarnilu inuuniarnerisa sunnerneqarnerat sumilluunniit qissiminneqarsimanngilaq, uffa sunnerneqarnerat annertungaaraluartoq.

Kalaallit Nunaanni ICC-ip siulittaasua, Aqqaluk Lynge oqarpoq, CO2-mik mingutsitsineq annertuumik apparsaraluarpalluunniit silap kissatsikkiartornera imaannaq unitsinneqarnavianngitsoq.

- Taamaattumik Balimi ataatsimeersuarnissami suliniutissanut peqataatinneqarnissarput anguniarparput, isumaqatigiissutip taartissaa kingusinnerpaamik 2012-imi naammassinissaa sioqqullugu, Aqqaluk Lynge oqarpoq.