Nunap inoqqaavisa ulluat nunatsinni nalliussineqanngilaq

Ullumi ulloq aggustip ulluisa qulingiluaat tassaavoq Naalagaaffiit Peqatigiit Nunap inoqqaavinut ullorititaat. Taamaasilluni aamma nunatsinni nunap inoqqaavisa ulluat. Taamaakkaluartoq ulloq nunatsinni nalliussineqanngilaq.

Inuusuttut ilaat aperaarput nunap inoqqaajuneq ullutsinni inuusuttatsinnut soqutiginarnersoq.

- Suu, tassa maani Kalaallit Nunaanni kalaallit aamma inunnut ilaagamik, inuit. FN-imi Inuit nunap inoqqaavisut akuerisaanikuupput, Siberiaminngaanniit Alaska, Canada Kalaallit Nunaat ilanngullugu inuiaapput inuit. Taamaattumik aamma uagut kalaallit inooriaratta aamma nunap inoqqaavisut imminut isigisinnaavugut.

Sara Olsvigip antropologi – inuup inuiaqatigiillu pissusiinik misissuineq - maanna ilinniarpaa, ilinniakkaminik naammassissutissaminik suliaqarnerminut atatillugu qaammatini tallimani New Zealandimeeqqammerluni. Tassani nunap inoqqaavi, maori-nik taaneqartartut, ilaatigut najorpai. Isumaqarpoq kalaallit nunap inoqqaajunertik maoritulli eqqarsaatigineq ajoraat.

- Ulluinnarni eqqqarsaatigineqarpallaarneq ajorpoq, nunap inoqqaajunerluni imaluunniit taamaattuunnginnerluni, taamaattumik New Zealandimi Maorit eqqarsaatiginerusarpaat Nunap inoqqaajunertik, Europamiut amerlanerussuteqariarmata.

Sara Olsvig isumaqarportaaq Nunap inoqqaavisa ulluat nalliussineqartariaqartoq, aamma eqqarsaatigalugu Naalagaaffiit Peqatigiit FN-imi ukiorpassuarni sulissutigisaat nunap inuiisa pisinnaatitaaffeqarnerulernerannik kinguneqartoq ukiormanna aalajangiiffiusussaq eqqarsaatigalugu.

-Eqqarsaatigiinnarpara ullumikkut ulloq taannaasoq, taavalu ukiup ingerlanerani pisimasut eqqaallartaarlugit soorlu Alaskami ICC-eertoqarnera taava nuannaarutigalugulu peqataasinamera.