Nunap inoqqaavisa pisinnaatitaaffiinut aalajangersagaq naammassiniarneqarpoq

decembarip 20-at 2005 16:54

Nunat inoqqaavisa pisinnaatitaaffii pillugit Naalagaaffiit Peqatigiit aalajangersagaliorniarnerat ukiut 20 - it suliarineqarsimasoq ukiumi nutaami naammassineqarnisssa naatsorsuutigineqarpoq.

Naalagaaffiit Peqatigiit ataani nunat inuiisa atatsimiititaaliaani ataavartumi Permanent Forum- imi ilaasortaq Aqqaluk Lynge oqarpoq aalajangersagaliorneq nunat inoqqaavisa illersorneqaatissarimmassuk pingaaruteqarluinnartuusoq:

- Nunat inoqqaavisa pisinnaatitaaffi allanut naleqqiullugu aalajangersaaffigineqartariaqarput, erseqqissaaffigineqarlutillu, Aqqaluk Lynge oqarpoq.

Aqqaluk Lynge oqarpoq inuiappassuit nunaminnik arsaagaasimasuusartut, oqaatsiminnik atuisinnaassusiat killeqartartut aammalu politikkikkut annertoorujussuarmik pisinnaatitaaffimminnik killersugaammata aalajangersagaq pingaaruteqarluinnartoq.

- Ajornartorsiuterpassuit tamakku qaangerniarneqassappata nalaagaaffiit pinngitsooratik najoqqutaqartariaqarput, Aqqaluk Lynge oqarpoq.

Aqqaluk Lynge oqarpoq Namminersorneq pillugu Ataatsimiititaliarsuup Kalaallit inuiattut akuerineqarsinnaaneranut apeqqummi suliaqarnerminni, aalajangersagaq toqqammivigalu sulinissaa naatsorsuutigineqarsinnaasoq:

-FN-nunap inoqqaavisa pisinnaatitaaffiinut aalajangersagassaa nunatsinnut sunniuteqarsinnavoq politikkikkut aalajangersagassat suli aalajangersaafigineqartussat suli aalajangersarneqanngimmata.

-Minnerunngitsumik sunniuteqarsinnaavoq Kalaallit inuiattut nalagaaffiip ataatsip ataani akuerineqarsinnaaneranut aalajangersaaniarnermi sunniuteqarsinnaavoq, tassami aalajangersakkami apeqqutit tamakku ilanngunneqartussaapput, Aqqaluk Lynge oqarpoq- nangillunilu: -Naalagaaffit akornanni pisinnaatitaaffinni tunngasut Ataatsimiititaliarsuarmi pineqarnerini naatsorsuutigineqarsinnaavoq siunissami nutaamik namminersornerunermik aaqqissuuussinermi aalajangersagaq qanoq annertutigisumik sunniuteqarsinnaajumaarnersoq massakkorpiaq oqaatigisinnaangikkaluarlugu naatsorsuutigissavarput kommitionimit nalilersorneqarumaartoq, Aqqaluk Lynge oqarpoq

Aqqaluk Lynge oqarpoq naatsorsuutigineqartoq Permanent Forumip Nuummi februaarip 13-ianiit 17-ianut atatsimiinnissaa sioqqullugu aalajangersagaq naammassineqarumaartoq.