Nunap inoqqaavisa isummersoqatigiiffiat ataatsimiilerpoq
Nunat inuiisa atugaat pillugit FN-imi isummersoqatigiiffimmi siulittaasunngorpoq Fillipinerimiu arnaq Victoria Corpus.
FN-ip isummersoqatigiiffiani ataatsimiinneq ukiumut ataasiarluni pisartoq, New Yorkimi ullumi aallartippoq, ullullu 14-nit ataatsimiinneq sivisussuseqassaaq.
Siulittaasumullu qinigaasoq Victoria Tauli Corpusip kingoraarpaa Finlandimiu Ole Henrik Magga.
Nunatsinniit peqataavoq Arkaluk Lynge, ICC-p nunatsinni siulittaasua, Arkaluk Lynge isummersoqatigiiffiup siulersuisuinut ilaasortaalersoq oqarpoq inuit 2000-t missaaniittut, nunat inuiisa kattuffiinit 1600-nersut ataatsimeeqataasut.
Nunat inuiisa atugaat pillugit FN-imi isummersoqatigiiffiuinnarani sullivinngornissaa anguniarneqalissasoq, Arkaluk Lynge radioaviisimut oqarpoq.
- Maanna alloriarneq neriuppunga ukiut pingasut qangitsinnagit anguneqarumaartoq, Arkaluk Lynge oqarpoq. Taanna aamma oqarpoq periarfissat nutaat kisiisa atorneqaannaratik, naalgaaffinni assigiingitsuni naalakkersuisunit tusarnaarneqarluni, pivisunngortitsisarnissanut atorneqarnissaa. Perrmanent forummimi siulersuisunut inissittut 16-t nutaat annertuumik suliassaqarput, suliniutillu assigiingitsorpassuit nammattussaavaat.
Arkalu Lynge neriulluarpoq, siulittaasortaarlu ilisarisimaneqarluarmat suliaminullu ilungersorumatuujummat aamma isumalluarnarluni.
Arkaluk Lynge aamma oqarpoq FN-mi attaviit assigiinngitsorpassuit sapaatip akunneratali siuliani ataatsimeeqatigisimallugit, paasiniarneqalissaarlu nunap inuiisa sullinneqalivinnissaannut allaffissaq, saaffiginnitarfissaq, minnerunngitsumillu FN-ip aningaasalersuisinnaaneranut periarfissat.
Arkaluk Lynge ukiut arlerlugit nunap inuiinik suliniartareerluni maanna isumaqarpoq, nunarsuarmi naalagaaffinni naalakkersuisut kiisalu FN-mi qullersaasut nunap inuiisa atugaat sullinneqalertariaqalernerallu saaffigineqartariaqalersut.
