Nunap inoqqaavi sukkornermik nungutaasinnaapput
Nunap inoqqaavi nunarsuarmi sumiiffinnit assigiinngitsuneersut ukioq 2100 nallertinnagu sukkornermit nungutaasinnaapput, immikkut ilisimasallit Sydney-imi sukkorneq pillugu ataatsimeersuartut ullumikkut taama nalunaarput.
Sukkornermik nappaalanerup Australiami nunap inoqqaavi navianartorsiortiinnarnagit aamma nunap inoqqaavi Aasiamiittut, Manerassuarmiittut aamma Amerika Kujallermiittut Avannarlermiittullu navianartorsiortippai, immikkut ilisimasallit taama isumaqarput.
Nunap inoqqaavisa inersimasortaasa affaat nappaammit eqqorneqareersut, ilisimatooq Stewart Harris naliliivoq.
- Kitaamiut nereriaasiannut nooriapiloorneq issiaannarlunilu inooriaaseqarneq, kinguaariit ikittuinnaat ingerlaneranni sukkornerup nappaatit tuniluuttartut taarsersimavai maannalu sukkorneq tassaalersimavoq nungutaannissaannut navianartorsiortitsinerpaaq, Stewart Harris oqarpoq.
Nunap inoqqaavisa sukkornermik nappaateqarnerat pillugu ataatsimeersuarnermi immikkut ilisimasallit periusissanik FN-imit malinneqartussanik isumaqatigiissuteqarniartussaapput, taamaalilluni sukkornermik nappaateqarneq iliuuseqarfigineqarsinnaaniassammat.
Ullumikkut nunatsinni innuttaasut 10 procentii sukkornermik nappaateqartut paasineqareerput.
Danmarkimi kalaallit 8000-it missaat najugaqarput taakkualu 10 procentii sukkornermik nappaateqarput.
