Nunap inoqqaavi Nuummi isumasioqatigiilerput
Aqagumiik aallartittumik nunap inoqqaavi nunanit assigiinngitsunit 21-neersut Nuummi pikkorissartinneqassapput.
International Training Center for Indigenous People, naalisarlugu ITCIP aaqqissuisoralugu nunap inoqqaavi Nuummi aqagumiit sapaatit akunneri tulliuttut marluk atorlugit, ilaatigut nunap inoqqaavisa piginnaatitaaffii pillugit pikkorissartinneqassapput. Aaqqissuisunit pingaartinneqarpoq peqataasut nunaminnut uterunik ilinniakkatik atorlugit nunap inoqqaavisa inuuniarnikkut pitsaanerusumik atugaqalernissaat anguniarlugu sulissuteqarnissaat aammalu nunarsuarmi nunap inoqqaavisa qaninnerusumik suleqatigiinnerulernissaat pingaartinneqarpoq.
- Nunap inoqqaavisa allat ajornartorsiutaannut assigusunik ajornartorsiuteqarpugut, taamaattumik eqqartueqatigiinnissaq pingaaruteqarpoq, Upaluk Poppel oqarpoq.
Upaluk Poppel-ip isumasioqatigiinnerup pitsaasumik inerneqarnissaa neriuuteqarfigaa peqataasullu nunaminnut uterunik ilisimasaminnik atorluaanissaat pingaartuutillugu oqaatigaa.
Pikkorissarnermut peqataasussanit oqaloqatigisatisinnit oqaatigineqarpoq , Kalaallit Nunaanni taamatut aaqqissuussineq peqataaffigissallugu assut pingaaruteqartoq. Peqataasunit oqaatigineqarpoq nunaminnut uterunik ilisimalikkatik atorlugit nunap inoqqaavisa pitsaanerusumik atugaqalernissaat ajornannginnerusumik sulissutigisinnaalissallugu.
