Nunap inoqqaavi nunatsinni naapissapput

februaarip 12-at 2006 17:30

FN-p nunap inoqqaavi pillugit ukiorititaannut atatillugu aqagumiit tallimanngornerup tungaanut ingerlanneqartussamik isumasioqatigiinneqassaaq. Isumasioqatigiinnermi inuit nunani assigiinngitsuneersut Nuummi tikeraartorineqassapput.

- Permanent forummi pilersinneqarpoq, nunat inoqqaavinut FN-ip ukiorititaasa ukiut qulit siulliit aallartimmata 90-ikkut aallartilaarnerani. Pilersinneqarneranut tunngaviuvoq, nunarput Danmarkilu peqatigiillutik nunat inoqqaavisa oqaluuserineranut tunngatillugu tamanna siunnersuutigineqarmat. Taamaammat manna tikillugu, Permanent forummip atuunnermini ukiumoortumik ataatsimiittarnerit pisarsimapput New Yorkimi FN-ip ataatsimiittarfissuani, massakkullu misilittakkat assigiinngitsut nunap inoqqaavisa misilittagaat nunarsuarmi tamaneersut peqatigiinnermik assigiinngitsunik naalakkersuisunut peqateqarneq, kattuffinnullu peqateqarneq misigilittagaalersimapput, tamakkulu uani naapinnermi katersorniarneqarput, ulluni tulliuttuni marlunngornermiit sisamanngorneq ilanngullugu pissaaq. Naapinnermi piareersaatigineqassaaq aalajangiiffiusussamik upernaaru maajimi New Yorkimi ataatsimiinnissami piareersaanissaq.

Nunatsinnullu ugguunakkut iluaqutaassaaq, nunatta ullumikkut inissisimaffia nunarsuarmi nunat inoqqaavisa naalagaaffimmut naalakkersuisuminnullu attuumassuteqarnerannut misilittakkat nunatsinniittut alaatsinaakkusunneqarmata. Tassuunakkut nunatta Danmarkillu akornanni pissutsit atuuttut alaatsinaakkusunneqarput iluatinnaataasinnaasut nunatta nittarsaassinnaasai nammineq isinik takullugit misilittagaqarfigineqarusummat, Josef Motzfeldt oqarpoq.

Taanna aperaarput, nunanut allanut naalakkersuisutut tikilluaqqusisussaammat ilaatigut qanoq oqaaseqassamaarnersoq.

- Isumaqarpunga massakkut nunat inoqqaavisa piginnaatitaaffeqarnerannik ukiuni kingullerni arlalissuanngortuni isumaqatigiinniarnerit Geneve-mi naammassineqartariaqarnerannut maani ataatsimiinnissaq aqqutissiuusseqataasariaqartoq. Tassani nunani piginnittussaaneq inuiattullu akuerineqarnissami oqaluuseqarneq pinngitsoornani qitiusussaavoq tassami suli naalagaaffeqarpoq nunat inoqqaavinik innuttalinnik isumaqartunik nunap inoqqaavi sumilluunniit piginnaatitaaffeqartariaqanngitsut. Taamaattumik tamanna ataatsimoorullugu qanoq misilittagaqarnerput aallaavigalugu iluarsiniagassatta pingaarnerpaasut ilagivaat, nunanut allanut naalakkersuisoq Josef Motzfeldt oqarpoq

Peqatigiinnissaq pillugu ataatsimiinneq – New Yorkimi FN-p qullersaqarfiata avataani ataatsimiinnerit siullersarissavaat, nunat inoqqaavinut Permanent forummimi ilaasortaasunit tamanit peqataaffigineqartumik.