Nunap inoqqaavi FN-imit ataatsimiissutigineqarput

Nunat inoqqaavi tuusintillit, New York-imi FN-ip qullersaqarfiata ataatsimiitsitsinerani peqataapput.

Tassungalu atatillugu Nunat Inoqqaavi pillugit FN-imi immikkut ataatsimiittartoqatigiit, Permanent Forumi, arfinilissaanik katersuupput.

Permanent Forum, tassaavoq FN-p iluani suleqatigiiffik nunarsuarmi tamanit toqqakkanik 16-inik ilaasortalik. Affai arfineq pingasut naalagaaffinnit toqqagaapput sinnerilu arfineq pingasut nunat inoqqaavisa kattuffissuisa innersuussuteqarnerisigut toqqagaallutik.

Kalaallit Nuaanni ICC-ip præsidentia Aqqaluk Lynge Issittumi nunat inoqqaavi sinnerlugit ilaasortaavoq, maannalu New Yorkimi ataatsimiinnermi peqatalluni. Aqqaluk Lynge-lu ima oqarpoq:

- Ukiopassuarni nunap inoqqaavisa ukiorpassuarni ajornartorsiutigisarsimasaat, tassalu nunamik piginnittussaaneq pisuussutillu, ukioq manna FN-ip aqaatsimiinnerani eqqartorneqassapput.

Tassami nunarsuarmi nunap inoqqaavi amerlasoorujussuit nunagisaminnik qimagutitaasimapput, imaluunniit nunagisai pisuussutinik piiaaffigineqarlutik. Tamakkua peqqutigalugit ajornartorsiutit annertoorujussuit atuupput, aammalu nunap inoqqaavisa nunamik piginnittussaanerat ajornartorsiutitaqartuarpoq, naalagaaffiit aqutsinerminni nunat inoqqaavisa immikkut nunaqarnissaat akuerisinnaannginnamikku. Pissutsit tamakku nunatsinnut attuumassuteqarluartuupput, taamaammat ullut imaannaanngitsut ulluni aggersuni misigisussaavagut, Aqqaluk Lynge naggasiilluni taama oqarpoq.

FN-ip New Yorkimi ataatsimiisitsinera Majip 25-iata tungaanut ingerlanneqassaaq.