Nunap inoqqaavi Canadami gay pridet anginersaannut peqataasut
Canadami illoqarfinni anginerni arlalinni sapaatit-akunnerata naanerani gay pridet arlallit ingerlanneqarput, anginersaallu Torontomi pivoq.
Premierminister Trudeau, nuliani meeqqanilu peqatigalugit ingerlaaqatigiinni saarlersaalluni peqataavoq, aammali tupaallaatigineqartumik Canadami indianerit høvdingit qullersaat, Perry Bellegarde, ingerlaaqataalluni.
Taassuma nunap inoqqaavi allat pisoqatigai, aamma neriusaap qalipaataanik ilulleqarpoq.
Perry Bellegardep CBC Newsimut oqaatigaa inuit marluinnik anersaallit, tassalu kinguaassiuutitigut allaanerusumik pissusillit, kulturiminni ileqqutoqqaminnilu silatuutut isigineqartartut aqutsisutullu inissisimanerusartut.
Aamma oqaatigaa inuit marluinnik anersaallit nunap inoqqaavisa akornanni kingumut tamakkiisumik akuerineqarnissaannut ataqqineqalernissaannullu piffissanngortoq.
- Taamaammat ingerlaaqatigiinneq gay pride ullumi peqataaffigivara, høvdingi Perry Bellegarde taama oqarpoq.