Nunap immikkoortuani sumiinneq aallaavigalugu sunik nerisaqarsinnaanermik siunnersuisoqarsinnaalerpoq

Nerisaqarnermut Siunnersuisooqatigiit naalakkersuisunut aaqqiissutissatut inassuteqaatinik arlalinnik nassiusseqqammerput.

Nerisaqarnermut Siunnersuisooqatigiit kalaalimerngit sorliit avatangiisinit mingutsinneqarsimanersut ullumi ilisimalersimavaat tamannalu tunngavigalugu nunap immikkoortuani sumiinneq aallaavigalugu sunik nerisaqarsinnaanermik siunnersuisoqarsinnaalerpoq.

Nerisaqarnermut Siunnersuisooqatigiit siulittaasuat Gert Mulvad ima oqaluttuarpoq:

- Kalaalimerngit mingutsinneqarsimanerat illoqarfimmiit illoqarfimmut assigiinngitsorujussuusarpoq. Najukkami suut nerineqartarnersut ilisimagaangatsigik inuit ataasiakkaat sunik nerisaqarnissaannik siunnersuisinnaasarpugut. Minnerunngitsumik naartusut sutortarnissaannik siunnersuinitsinni tamanna atorajuttarparput, Gert Mulvad oqarpoq.

Nerisalli pillugit siunnersuinissaq imaannaanngitsuusarpoq.

- Kalaalimerngit mingutsinneqarsimasut nerineqartannginnissaannik siunnersuiniarutta sapinngisamik allanik nerineqarsinnaasunik peqartariaqarpugut. Amerlanerillu kalaaliminernik peqqinnarsorisaminnik neriunnaamisariaqarput, Gert Mulvad oqarpoq.

Tamannalu piviusunngortinniarlugu inuppassuit ikiuuttariaqarput.

- Nunaqarfinni niuertut allattaaveqarput; allattaavik taanna peqqinnartortaqarnersoq misissuiffigineqarsinnaavoq. Naalakkersuinermik suliaqartut aningaasaliissutissanik akuersisussaanertik pillugu suleqataasariaqarput. Minnerunngitsumillu atuisut pisiarniarfinni sunik pisiassaqartitsinissaminnut akisussaaffeqaramik suleqataasariaqarput, Nerisaqarnermut siunnersuisooqatigiit siulittaasuat Gert Mulvad naggasiivoq.