Nunap assingi digitaliusut pitsanngorsarneqassapput
Nunagis 2008-mi atulerpoq, ullumikkulli alliligassanngorlunilu aaqqissuulluagassaalersimalluni. Tamanna qanoq iliorluni anguneqassanersoq isumasioqatigiisitsinermi, Nunami sumiiffinnut paasissutissanut immikkoortortaqarfimmit aaqqissuunneqartumi, oqaluuserineqassaaq.
- Paasisat paasissutissallu qarasaasiamut ilineqartalerpata, allaffissorneq nukittorsarneqartussaavoq aammalu inuiaqatigiit paasisimasaqarnerulissallutik. Tamatumalu politikerit aalajangiiniarnerminni sakkussaqarluarnissaannut iluaqutaassaaq, Klaus Georg Hansen oqarpoq.
Taanna aamma oqaluttuarpoq, pisortat aqutsiviini suliassat tamarmiusut 80 procentii tikillugit nunami sumiiffinnut attuumassuteqartartut.
Assersuutigalugu aalisagartassiisarnermi nunami sumiiffinni assigiinngitsuni aalisagaqassutsimi ilisimasat tunngavigineqartartut, soorluttaaq atuarfinnik ineriartortitsinermi suliani illoqarfinni nunaqarfinnilu inunngortartut amerlassusaat tunngavigineqartartut.
Tekonologi, ilaatigut Google Earthimi ilisimaneqartoq assigalugu, nunami sumiiffik ataaseq pisortat suliassanik suliaqarneranni paasissutissarpassurnik imaqartoq 'matuersaatitut' atorneqarsinnaassaaq, soorlu inunnik sullissinermut tunngatillugu CPR-normutut pitsaatigaluni.
Internettimi tunngavissamik, nunami sumiiffinnut paasissutissanik nassaarfiusinnaasumik ineriartortitsinissaq pilersaarutigineqarpoq.