Nunanut siuarsarniakkanut juullimut ammartagaq ataasinngorpamit tunisaalissaaq

Juullimut ammartakkami ammagassaq siulleq qaammatip aappaa avillugu qaangiuppat aatsaat ammarneqartussaagaluartoq, nunanut siuarsarniakkanut juullimut ammartagaq ataasinngorpamit tunisaalissaaq. Tunisaaneranit sinneqartoorutit ukiormanna Myanmarimi Dansk Flygtningehjælpip angisuumik suliniteqarfigisaanut meeqqanut tunniunneqassapput.
oktobarip 10-at 2013 11:08

Ukiuni amerlasuuni sorsuuttoqarnerata pinngortitamilu ajunaarnersuaqartarnerata kingunerisaanik meeqqat tuusintilippassuit angerlarsimaffeerussimapput. Amerlaqisut qimaasut ineqarfiini maanna najugaqavissortuupput. Dansk Flygtningehjælpip nunanut siuarsarniakkanut katersuiniarluni juullimut ammartakkamik suliniuteqarneratigut meeqqat atuarnissaannut, pisinnaatitaaffiinik ilinniartinnissannut, imminnut paarinissaannut peqqissuunissaannillu ilinniartinnissaannut atorneqartarput.

-Nunanut siuarsarniakkanut katersuiniarluni juullimut ammartagaq Danidap innuttaasunut suliniutaasa pingaarnersaraat, danskit meerartaannik meeqqat nunani piitsoqarfinni najugaqartut pillugit ukiuni 51-ini ilinniartitsissutitut atorneqarsimalluni. Ammartagaq, atortussallu tassunga ilaasut, atuartut nunarsuarmi sunik pisoqarneranik ilinniartinnissaannut meeqqallu Danmarkimiittut nunanilu piitsoqarfinniittut atassusernissaannut atorneqartarpoq.

-Myanmarimi/Burmami meeqqat qimaasut nunanut siuarsarniakkanut katersuiniarluni juullimut ammartakkatigut ikiorsinnaagatsigit nuannaarutigeqaara - pisariaqartitseqaammi, Danmarkimi nunanut siuarsarniakkanut ministeri Christian Friis Bach oqarpoq.

Nunanut siuarsarniakkanut katersuiniarluni juullimut ammartagaq maani nunatsinni aamma pisarineqarsinnaassaaq. Grønlandsbankenimi Aasianni, Ilulissani, Qaqortumi, Maniitsumi, Sisimiuni Nuummilu sapaatit akunnerata tullianit tunisaalissaaq.

300-nik piniarpugut, tamaasalu tuninissaat neriuutigaarput. Ammartakkat ukiorpassuani tuniniartarpagut, ukiorli taanna Nissebanden i Grønlandimut tunngasup tunisaaffigisaani tamakkerlugit tunivagut, Niels Nielsen Grønlandsbankenimeersoq KNR-imut oqarpoq.