Nunanut piitsunut aningaasaliissutissat utaqqikatanneqarput

Silap pissusaata allangoriartornera pillugu nunanut piitsunut koruuninik milliardilikkaanik tapiiniarlutik nunat pisuut 2001-imi neriorsuutigaat. Nunalli piitsut nunat pisuut neriorsuilussinnarsimanerarlugit maanna appisaluutilerpaat. Danmarkip Radioata nittartagaani tamanna allaaserineqarpoq.
novembarip 25-at 2009 13:47

Nunat piitsut ukiumut 2 milliardit koruunit sinnerlugit tapiiffigisarniarlugit EU-p nunallu tallimat Bonn-imut isumaqatigiissummik taaneqartartumi neriorsuutigaat. Silap pissusaata allanngoriartornerata kingunerisaanik nunani piitsuni ajoquserneqarsimasunut aningaasat taakku atorneqartassasut taamanikkut takorloorneqarpoq.

Neriorsuutigineqartulli sisamararterutaasa missaannaat kontomut taamanikkut pilersinneqartumut manna tikillugu ikineqarsimasut, Tuluit Nunaanni TV-qarfissuarmit, BBC-mit, paasineqarpoq.

Aningaasat allanut atugassanngorlugit, soorlu ineriartortinniakkanut ikiuutitut aamma illugiilluni niueqatigiinnissamik isumaqatigiissutinut, ikineqartarsimasut Nunat EU-mut ilaasortaasut utoqqatsissutigaat. Silalli pissusaata allanngoriartornera pillugu isumaqatigiinniartartut miserratiginngilaat anngaasarpassuit milliardilikkaat neriorsuutigineqartut ilumut nunanut piitsunut annguttarsimanersut uppernarsarneqarsinnaanngitsoq.

Silap pissusaata allanngoriartornera pissutigalugu aseruatiterinerpassuit nunat piitsut taartisissutigissaneraat Københavnimi ataatsimeersuarnissami oqaluuserisassanut pingaarnernut ilaapput. Soorlu Afrikami nunat piumasaraat nunat pisuut 330 milliardit koruuninik aningaasaliissasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq