Nunanut allanut unammisartut unammisassaat sakkortuut

Unammersuarnissani arsaqatigiit sorliit imminnut unammissanersut ullumi makitsissutigineqarput.

Kalaallit Nunaat gruppe B-imut inissippoq  tassani unammissallugit Argentina aamma Chile. Nunat taakkua assammik arsallaqqinnernut ilaapput.

Kalaallit arsartartuisa gruppeqatiminni unammisassaasa pingajuat tassaaavoq Mexico, siorna anngunniunnermi Kalaallit Nunaat Mexicomut ajugaavoq.

Gruppe A-miittussat tassaapput Brasilien, Uruguay, USA, Venezuela aamma Guatemala.

Nunanut allanut unammisartut sungiusaasuat Niels Møller makitsoqareernerup kingorna oqarpoq,  Kalaallit Nunaata unammisartui Gruppe A-miinnissaat nammineq kissaatiginartinnerusimallugu  - anngunniunnissanut unamminerni Chilemut unamminissaq pinngitsoorneqarsinnaassagaluarmat.

Chile aamma Kalaallit Nunaat  gruppeminni ajugaaniutivinnissamut ilungersortussaapput, Niels Møller oqarpoq.
Kalaallit Nunaata anngunnissamut periarfissai ajorseriarsimanerarlugit, Niels Møller qanittukkut oqaluttuarpoq, nunanut allanut unammisartuni arsallaqinnerit ilaat arsaqataasinnaajunnaarmat.

Miki Heilmann Nuummi GSS-imi arsartartoq anngunniunnissamut peqataasinnaanngimmat isikkami saanertaasa ilaat napisimammagu.

Miki Heilmann taarserlugu nunanut allanut siornatigut unammisartoq Johannes Groth arsaqataassaaq.

Nunanut allanut unammisartut Københavnemi sapaatip akunnerata naanerani sungiusarlutik katersuunnerisa kingorna anngunniussamut arsaqataasussat marluk ataasinngorpat toqqarneqassapput - arsarlutik unammisussat katillutik 16-iussapput.

Pissartanngorniunnerit juunip 23-anit 29-ata tungaanut ingerlanneqassapput.