Nunanut allanut unammisartut sungiusaasuata piginnaanillit nutaat isumalluarfigigai

Assammik arsarlutik nunanut allanut unammisartut angutitaasa sungiusaasuata Nunatsinni pissartanngorniuunnerit naammagisimaarpai inuusuttullu unammisartut marlussuit immikkut maluginiarsimallugit.
Assi © : Camilla Dam/KNR
maajip 04-at 2015 07:03
Nutserisoq Simon Uldum -

Angutit nunatsinni assammik arsarlutik pissartanngorniuunnerat naammasseqqammersoq angusatigut nikerarfiungaatsiarpoq, tamannalu nunatsinni timersoqatigiiffinni assigiinngisitaartupilussuarmik sungiusartoqartarneranut takussutissaavoq, nunanut allanut unammisartut sungiusaasuat Niels Møller taama oqarpoq, aammali nuannaarutissartaqarnerarpaa.

- Unammisartoqatigiikkuutaat amerlanerit unammisartunik inuusuttunik ilaqarput GM-ip naammagisimaarnartumik naammassinissaanut piumassusermik angisuumik takutitsisunik. Sungiusarnerulli tungaatigut annertuumik suliassaqarpoq. Tamanna qularutissaanngilaq, nunanut allanut sungiusaasoq Niels Møller taama oqarpoq.

 

Milan Olsen immikkut piginnaanillit ilagaat

Niels Møller unammisartunik Nuummi aasaru sungiusartussanik toqqaaqqammerpoq, taakkulu ilaatigut danskit nunanut allanut unammisartuinut U21-nut pikkorissupilussuarnut pingasoriarlutik unammisussaassapput.

Taamaammat GM unammisartut qanoq inissisimanerinik naliliinissamut periarfissat kingullersaattut atorneqarpoq.

Aamma atuaruk Nuummiut pissartanngoqqittut

Aamma atuaruk Pissartanngortut timersortarfimmilu nuannattut

Nunanulli allanut unammisartut sungiusaasuata Nunatsinni unammisartut amerlanersaat ilisimasaqarfigilluareerpai. Taamaammat unammisartut inuusuttunik nutaanik ilaqarluarnerat immikkut nuannaarutigaa. Pingaartumillu iluliarmiu Milan Olsen N-48-meersoq nunanut allanut unammisartussatut piukkussat ilagivaat. Pitsaaqutaasa ilagaat 2 meteringajannik angitigigami. Kalaallit unammisartut taama angitigisut akuttupput, taamaammat suleqatigalugu misilikkusupparput. Immikkut piginnaaneqarpoq, nunanut allanut unammisartut sungiusaasuat taama oqarpoq.

 

Misigisassaq angisooq sakkortussamaartorlu

Nunarsuarmi inuusuttut assammik arsarlutik nunanut allanut unammisartut pitsaanersaasa ilaannut, tassalu danskinut, unamminissaq Niels Møllerip qilanaarinerarpaa. Unammisartoqatigiit tamarmik Danmarkimi ligami unammisartuupput Kalaallit Nunaannullu unammereerunik U21-t VM-ernerannut peqataasussaallutik.

- Nunamut allamut unamminerit pingasut Nuummi ingerlanneqarnissaat misigisassaassaaq angisooq. Unamminerillu uatsinnut pingaaruteqartupilussuussapput, danskimmi nunanut allanut unammisartuinut qanoq akiuussinnaatiginerluta takusussaassagatsigu, Niels Møller taama oqarpoq.

Angutit nunanut allanut unammisartut

Angutit nunatsinni assammik arsarlutik pissartanngorniunnerisa kingorna nunanut allanut unammisartussat Nuummi juunip qulingiluaanit 14-iata tungaanut sungiusarnissaannut nunanut allanut unammisartut sungiusaasuata Niels Møllerip toqqarpai.

 

Sungiusartoqarnerani danskit nunanut allanut unammisartuinut u-21-inut pingasoriarlubni unammisoqassaaq

 

Toqqarneqartut tassaapput:

  • Isak Olsen                                  GSS
  • Lars Ole Lyberth                       GSS
  • Milan Olsen                               N-48
  • Gustav O. Egede                       NUK
  • Nuka Heilmann                         GSS
  • Miki Heilmann                           GSS
  • Minik Dahl Høgh                       GOG
  • Andreas Lorentsen                   GSS
  • Aqqalu Ingemann                     GOG
  • Danny Brandt                            GSS
  • Muusa  O. Søholm                    Norsaq
  • Patrick Frederiksen                  GSS
  • Angutimmarik Kreutzmann    Nordsjælland H
  • Eqalunnguaq Kristiansen         GSS
  • Akutaaneq Kreutzmann           GOG

RESERVIT  (pisariaqartitsineq naapertorlugu aggersarneqartussat) :   Nuuno Lars Olsen N-48  - Mikkel O. Søholm Norsaq - Miki Johnsen NUK  - Nukannguaq Salomonsen SAK  -  Inuk Olsen GSS  - Taatsiaq B. Villadsen NUK.