Nunanut allanut unammisartut sungiusaasuat Concacafip itigartitsinerata kingorna: Tamanna naapertuutinngilaq
Amerikap avannaani arsaattartut kattuffiata (Concacafip) juunip aallartinnerani nunatta ilaasortatut akuerinninnginnera, nunanut allanut unammisartunut sungiusaasup Morten Rutkjærip suli sunnerneqaatigaa.
Taama nunanut allanut unammisartunut sungiusaasoq TV 2 Sportimut oqarpoq.
- Kalaallit Nunaat nunanut allanut pisortatigoortumik unamminngisaannassaaq. Tamanna upperiuminaappoq. Tamanna upperiuminaappoq. Arsaattartuuneq eqqarsaatigalugu pingaartumik Kalaallit Nunaanni meeqqanut inuusuttunullu tamanna alianarpoq, maannakkummi takorluugassaqarnatillu anguniagassaqarunnaarput. Isikkamik arsaannermi peqataasinnaatitaajunnaarnerput naapertuilluanngitsuusoraarput, Morten Rutkjær oqarpoq.
Concacafip immikkut ittumik ataatsimeersuarnerani juunip qulingiluaanni USA-mi Miamimiittumi nunat ilaasortat 41-t nunatta ilaasortanngornissaa taasissutigaat. Concacaf Amerika Avannarlermi, Amerika Qiterlermi Caribiamilu ilaasortaqarpoq.
Nunanut allanut unammisartut sungiusaasuat naapertorlugu nunanit 41-nit tamanit itigartitsisoqarpoq.
- Piffissap ingerlanerani ilaasortanngornissarput anguniarlugu suut suliarissanerlugit paasitinneqarumaarnerput minnerpaamilluunniit naatsorsuutigigaluarpara. Kisiannili tunngavissaqanngitsumik titarnernik qulinik allassimasumi itigartinneqarnerput tupaallaatigingaarpara, taanna TV 2 Sportimut oqarpoq.
Sungiusaatigalugu unammisoqaannartassasoq
Sungiusaasoq naapertorlugu tamatuma kingorna nunap pitsaanerusumik inissisimalernissaanut tunngatillugu arsaattartut kattuffiat allatut iliuuseqarsimasinnaanersoq nunatta akissutissarsiniarsimavaa.
- Periusissaq malissimallugu akissuteqarput, tassa nunat ilaasortaasut tamarmik ataatsimeersuarnermi taasinissamut periarfissinneqarnerisigut. Taamaattumik suut tamarmik eqqortumik suliarineqarput. Siunissamilu "iluatsitsilluarnissatsinnik“ kissaappaatigut, Rutkjær oqarpoq.
Taamaasilluni nunarput nunavissuarmi arsaattartut kattuffiannut suli ilaasortanngunngilaq, taamaallaallu sungiusaatigalugu unamminerit nunat tamalaat arsaattartut kattuffiannit (FIFA-mit) akuerineqarsimanngitsut unammiffigisinnaavai.
Aamma anngunniunnerit peqataaffigisinnaanngilai.
Danmarkimut atassuteqarneq eqqarsaatigalugu nunarput Savalimmiut assigalugit Europami Arsaattartut Kattuffiannut (UEFA-mut) ilaasortaasariaqaraluarpoq.
Nunalli ilaasortaasut Naalagaaffiit Peqatigiinnut ilaasortaasariaqartut UEFA-p piumasaqaatigaa. Nunarput tassunga ilaasortaanngilaq.
Concacaf taamatut piumasaqaateqanngimmat nunarput ilaasortanngornissamut qinnuteqarsimavoq, iluatsinngitsumilli.
