Nunanut allanut unammisartut: Pissartanngorniuteqataarusuppugut

Arnat assammik arsarlutik nunanut allanut unammisartut nunarsuaq tamakkerlugu pissartanngorniunnermut anngunniunnermi semifinalimut anngutinngitsuungajapput. Nunanut allanut unammisartut pissangasorujussooreerlutik nuannaarlutik oqaluttuarput.

Assammik arsarlutik nunanut allanut unammisartut anngunniunnerup aallartinnginnerani anguniagaat tassaavoq: Nunarsuaq tamakkerlugu pissartanngorniunnermut nunanut amerika avannarlermiittunut caribiamiittunullu anngunniunnermi semifinalimut anngunnissaq.

Tamannalu Canada 45-21-mik sisamanngomat ajugaaffigereerlugu anguaat.

Tassanilu isertitsisaqattaartariaqarsimapput. Cubamummi ajorsarmata, USA-mullu naligiimmata semifinalimut anngunnissaq unamminernit marlunnit aalajangerneqartussanngorsimavoq. Unamminermilu ataatsimi namminneerlutik ajugaasariaqarput.

- Siullermik Canadamut unammilerluta siumut nalunngereerparput semifinalimut anngunniarutta målerparujussuarnik ajugaasariaqarluta. Taamaammat målinik amerlanerpaanik ajugaaniarluta assoroorsimaqaagut, Ivaana Holm oqarpoq.

AAMMA ATUARUK Semifinalimut anngunnissaat naatsorsuutigaara

Unamminerup allap naammassinissaa utaqqigaat

Unamminerli alla nunatta semifinalimut anngunnissaanik aalajangiisussaq, tassalu USA-p Cuballu unamminerat, namminneerlutik sunniuteqarfigisinnaanngilaat. Tassani Cubap ajugaanissaa, isertitallu nikinganerata USA-miit pitsaanerunissaa neriuutigaat.

- Unammereeratta ataatsimoorluta isiginnaartarfimmut ingilluta Cubakkut illersorsuataarpagut, nalunnginnatsigu målinik arlalinnik USA-mut ajugaasariaqartut, Sara Biilmann Egede oqarpoq.

Isertitaq ataaseq semifinalimut anngutsitsisoq

Cubalu 27-21-mik ajugaavoq. Nunarpulli USA-lu naligiingaarmata kikkut semifinalimut anngussanersut paasiniarlugu isertitat kiseqqissaarneqarput.

- Taava Cubakkut naammassineraninngaanniit 15-20 minutsit utaqqisinneqarpugut, IHF-ikkut (nunani tamalaani assammik arsartartut kattuffiat aaqq.) kisitsineranni. IHF-ikkut kisitsinerat misigisatsinni sivisoorujorujussuuvoq, Nivi Fly oqaluttuarpoq.

- Allaanngilaq 1 tiimi utaqqilluta, Andrea Andreassen oqaluttuarpoq.

Nunanullu allanut unammisartut sungiusaasuat kiisami nuiagami qungujulavoq.

- Paasitillutalu semifinalimut annguttugut. Misigissuseq oqaluttuarineqarsinnaanngitsoq misigaarput, Nivi Fly oqarpoq.

Nunarput ataasiinnarmik isertitaqarnerulluni ingerlaqqippoq.

AAMMA ATUARUK Kalaallit Nunaat semifinalimut ingerlaqqippoq

Taamatullu Mexicomut aallannginnerminni anguniakkatut aalajangiussartik anguaat.

- Ukiut marluk sukataarluta sungiusartarluta pinikuuvugut. Unammigiartigatalu una semifinali anguniarnikuullugu, Aviaaja Heilmann oqarpoq.

- Ukiut marluk kingulliit ataatsimoorluta sungiusartarsimavugut. Timersortarfimmiinnaanngitsoq, kisianni aamma naluttarfimmi taavalu saniatigut nukkassartarluta. Taava aallannginnitsinni taanna anguniagarput angugatsigu tupinnaqaaq. Nuanneruloorpoq, Andrea Andreassen oqarpoq.

Pissartanngorniuteqataaniartut

Nunanulli allanut unammisartut allamik maanna anguniagaqalerput.

- Puerto Rico unammissavarput, unamminissarput piareersarfigilereerparput, Najaaja Lyberth semifinalimut innersuussilluni oqarpoq.

Puerto Ricolu kalaallit unammisartuinit naluneqanngitsut Mia Egede Rasmussen oqaluttuarpoq.

- Puerto Ricokkut unammillattaartareerpagut, taamaammat assut qilanaarpugut. Ajugaaffiginikuullugillu ajorsarfiginikuuagut. periarfissagissaarpugut, Mia Egede Rasmussen oqarpoq.

Aviaaja Heilmannilu isumaqataavoq.

- Finali maannakkut anguniarparput, taanna oqarpoq.

Nunarput Puerto Ricolu arfininngornermi nunatsinni nalunaaqutaq unnukkut arfineq-marlunut semifinalissapput.

Sapaatiuppat pissartanngorniuttoqassaaq, tassanilu ajugaasoq nunarsuaq tamakkerlugu assammik arsarlutik Japani ukioq manna pissartanngorniunnermut anngussaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat