Nunanut allanut unammisartut Maniitsumi katersuuttut
U-19-nik taasat angutit inuusuttuaqqat nunanut allanut unammisartui Maniitsumi maanna katersuupput, sapaatiuppallu inaarutaasumik toqqaasoqassalluni.
Allattoq Per Andersen
januaarip 13-at 2012 12:00
- Sapaatip akunnera atorlugu piginnaasaminnik takutitsinissaminnut periarfissaqarput. Peqataasut tamarmik aqqaneq marluusut teknikkikkut pikkoripput. Sapaatiuppalli marlunnik ilanngartariaqassapput, killissaali tikillugu unamminerussaaq, sungiusaasoq Ove Thomassen oqarpoq.
Katersuunnermi klubbit pingasut peqataatitaqarput, tassaasut: AVI Maniitsumiit, KT-VI Kangaamiuniit kiisalu TVK Tasiilamiit. U-19-it Maniitsumiinnerminni AVI-p angutitaanut, nunatsinni pissartaasunut sungiusaammik unammisaqattaassapput.
Ukioq manna issittormiut unammiuaarnerat Arctic Winter Games Canadami Yukonimi Whitehorsemiittumi martsip aappaaniit qulingata tungaanut ingerlanneqassaaq.
