Nunanut allanut unammisartut ivigaaqqaniissapput

Sungiusaasoq Tønnes Kaka Berthelsen sungiusaasumullu ikiorti Rene Olsen, arsaannermi peqataasussat toqqarniarnerini peqqissaartumik iliorsimallutik oqarput. 

Arsaannermi unammisussat toqqarniarnerat sivisusimavoq, Island Gamesimi Isle of Wightimi pisussami unamminissamut piareersariartorlutik sapaatip akunnerani tulliuttumi Islandiliassapput.

Island Games-imi unamminerni aallarniutaasuni ajugaanissaq siunertarineqarpoq aamma unamminerit tamaasa ajugaanissaq siunertaavoq, sungiusaasumut ikiorti Rene Olsen oqarpoq.

Kalaallit puljeqatigissavaat Jersey, Menorca aamma Rhodos. Puljemi ajugaasut kisimik semifinalemut ingerlaqqissinnaapput.

Kalaallit angutit unamminerat siulleq pissaaq juunip 26-at Rhodos unammineqassammat. Juunip 27-ani Menorca unammissavaat kiisalu juunip 28-ani Jersey unammissallugu.

Nunanut allanut unammisartut Islandimiinerminnni ullormut marloriarlutik sungiusartassapput, sungiusaatigalugulu marloriarlutik unammissapput.

Islandimi sungiusarnerit arsaattarfimmi  ivikkanik sanaajusumi pisassapput, tamannalu pingaaruteqarpoq, Island Gamesimi pissartanngorniunnerit sioqqullugit ivikkani arsaanneq sungiunneqassammat.

Angutit isikkamik arsaalluni nunanut allanut unammisartut sungiusaasuat Tønnes Kaka Berthelsen , Island Gamesimi pissartanngorniunnerup kingorna sungiusaasutut unissaaq, Kalaallit Nunaanni Timersoqatigiit Kattuffiat GIF taamatut nalunaarpoq.

Aajuna angutini puljenut agguataarineq:
Pulje A:
Jersey
Menorca
Rhodos
Grønland

Pulje B:
Isle of Wight
Alderney
Gibraltar
Ynes Mon

Pulje C:
Guernsey
Gotland
Isle of Man
Falklandsøerne

Pulje D:
Åland
Saaremaa
Western Isles