Nunanut allanut unammisartoq hashimik eqqusseriaraluartoq
Isikkamik arsaalluni nunanut allanut unammisartoq 24-nik ukiulik ikiaroornartumik hashimik eqqusseriaraluartutut eqqartuunneqarpoq. AG-mi ullumi saqqummersumi taama allaaserinnittoqarpoq.
Allattoq Mads Lynge
novembarip 20-at 2008 17:16
Angut oktobarip 17-iani tigusarineqarpoq, paasinarsivorlu hashimik 660 gramimik nunatsinnut eqqusseriaraluartoq. Kingorna 66.000 koruuninik akiligassinneqarpoq ukiumillu ataatsimik pineqaatissinneqarluni.
Nunanut allanut unammisartoq Danmarkimi najugaqarpoq, Sisimiuliartillunili politiinit tigusarineqarluni.
Kalaallit Nunaanni arsaattartut kattuffianni siulittaasup Lars Lundbladip pisimasoq ajuusaarnartuutippaa, kattuffillu decembarip qulingiluaani ataatsimiilerpat pisimasoq eqqartorneqartussanut ilaalluni.
Nunatsinni timersoqatigiiffiit kattuffianni siulittaasup Nuka Kleemannip pisoq aamma ajuusaarnartuutippaa:
- Timersortartut maligassiuisussaapput, ingammik nunanut allanut unammisartutut toqqagaasimasut, Nuka Kleemann oqarpoq.
