Aleqa Hammond: Nunanut allanut tunngasunut ministerip suna utaqqivaa?

Aleqa Hammond nunanut allanut tunngasunut ministerimut Anders Samuelsenimut tamanna pillugu apeqquteqaateqarpoq.

Sikumik alapernaarsuinerup annertusinissaa nutarsarnissaalu, Kalaallit Nunaallu tamakkerlugu sullivigilersussaagaa, nunanut allanut tunngasunut ministerip novembarimi saqqummiuppaa.
Sikumik alapernaarsuinerup annertusinerata Kalaallit Nunaanni aningaasaqarnerup ineriartorneranut, amerlanerusunilllu takornariaqalernissamut iluaqutaasinnaanissaa ministerip aamma oqaatigaa.

AAMMA ATUARUK Ilisimatusarfik nutaaq Issittumilu nakkutiginninnerulerneq

Kalaallit Nunaat tamakkerlugu sikumik alapernaarsuinerup annertusinissaa Danmarkip naalakkersuisuisa suli isummerfigisimanngikkaat, Anders Samuelsenip Aleqa Hammondimut akissuteqaataani allassimavoq. Kalaallit Nunaanni tamakkerlugu sikumik alapernaarsuinermik eqqussinissap qanoq sivisutigissanera, qanorlu akeqassanersoq ministerip akissuteqaataani aamma allassimagaluarpoq:

- Naluara sooq ministeri nangaanersoq. Erseqqilluinnarpoq, Kalaallit Nunaat tamakkerlugu sikumik alapernaarsuinerup eqqunneqarnerata kikkunnut tamanut ilaqutaanissaa, aammalu ilaatigut sinersorluni umiarsuit takornariartaatit sukkasuumik ineriartornerat eqqarsaatigalugu, maanna takusaleriikkagut, Aleqa Hammondip, Folketingip Kalaallit Nunaat pillugu ataatsimiititaliaa aqqutigalugu ministerimut apeqquteqaataani ilaatigut allaaserisaqarpoq, nangillunilu:

- Uanimi danskit naalakkersuisuisa Kalaallit Nunaanni immap assinginik suliaqarneratut inississanngilagut. Taamaattumik ministeri nassuiaaqqullugu qinnuigaara apeqqutigalu malitseqartitassatut nassiullugu, Folketingimut ilaasortaq Aleqa Hammond oqarpoq.

AAMMA ATUARUK Qarasaasiat qaammataasallu umiarsuarmik angallanneq isumannaallissagaat

AAMMA ATUARUK Kujataani sikunik alapernaarsuinerup nutarsarneqarnera isumannaannerulersitsissasoq