Nunanut allanut tunngasunut ministeri: Kina Kalaallit Nunaanni sinniisoqarfeqalerniarsarinngilaq

Nunat tamalaat Issittumut pingaartumik nunatsinnut soqutiginninneruleriartornerat piffissami sivitsortumi oqallisigineqarpoq.

Danskilli nunanut allanut tunngasunut ministeriata, USA-p saniatigut nunat allat nunatsinni nutaanik sinniisoqalerniarneranik ilisimasaqanngilaq.

Tamanna Folketingip Kalaallit Nunaannut tunngasunut ataatsimiititaliaani akissutaani allassimavoq.

AAMMA ATUARUK USA Kalaallit Nunaanni ataavartumik aappaagu sinniisoqarfeqalissaaq

- Nunanut allanut tunngasunut ministereqarfiup nunat allat Kalaallit Nunaanni sinniisoqarfimmik pilersitsiniarnerminnik periarfissarsiornerannilluunniit ilisimanngilaa, ministeri allappoq.

- Island kingulliulluni Kalaallit Nunaanni sinniisoqarfimmik pilersitsivoq. USA sinniisoqarfissaminik ukioq manna ammaanissaa naatsorsuutaavoq.

Sinniisoqarfimmut tunngatillugu apeqqut kalaallit folketingimut ilaasortaannit, Aaja Chemnitz Larsenimit (IA) apeqqutigineqarpoq.

- USA-p Nuummi sinniisoqarfimmik ammaarusunnera 2019-imi nalunaarutigineqarpoq. Kina Kalaallit Nunaanni assingusumik pilersitsinissamik kissaateqarsimanersoq kiisalu nunat allat Issittumiittut Issittullu avataaniittut assinganik soqutiginninnersut ministerimit nalunaajaatigeqquneqarpoq, politikeri allappoq.

USA-p Nuummi allaffik amerikamiumik atorfilimmik inuttalerlugu maajimi siorna ammarpaa. Pilersaarullu malillugu sinniisoqarfimmi sulisut katillugit arfineq-marluk 2020-mi sulilissapput.

Amerikamiut nunanut allanut tunngasunut ministereqarfiata oqaaseqaat Washingtonimi Kongressimut nassiussaa tunngavigalugu nutaarsiassaqartitsivik, AP taama allaaserisaqarpoq.

Oqaaseqaat naapertorlugu Nuummi sinniisoqarfimmi sulisut ’kalaallinut atorfilinnut inuiaqatigiinnullu qanimut atassuteqarnermik’ pilersitsissapput.