Amerikap Danmarkimi aallartitaa Carla Sands, Diplomatilu Sung Choi

Nunanut allanut tunngasuni qaffasissumik atorfillip nunarput USA-lu imminnut qaninnerulersissavai

Nunatta USA-llu suleqatigiinnerat nukittorsarniarlugu USA nunatsinni sulisartussamik atorfinititsisimavoq.

Amerikamiu diplomati Sung Choi USA-p nunatsinni sulisorissavaa.

Taanna Amerikamiut aallartitaannit Carla Sandsimit inuussutissarsiorneq pillugu ataatsimeersuartoqarnera Future Greenlandimi ullumi ilisaritinneqarpoq. USA-p ataavartumik sulisoqalernermigut nunatsinnut naalakkersuinikkut attaveqarnini nukittorsarusuppaa.

Song Choip nunatta USA-llu naalakkersuinikkut inuussutissarsiornikkullu attaveqarnerisa nukittorsarnissaa suliassarissavaa.

- Kalaallit Nunaata USA-llu akornanni aningaasarsiornikkut atassuteqartilernissaat suliassama ilagissavaat, Sung Choi KNR-imut taama oqarpoq.

AAMMA ATUARUK USA nunatsinni sinniisoqarfittaarniarpoq

USA-p nunatsinni suliaqarnerulerniarnera sinniisoqarfittaarniarnermik aallartitaqarfittaarniarnermilluunnit isumaqanngilaq. Taamaattoq USA sulisumik sulinermini nunatsinniittartussamik Danmarkimiittartussamillu atorfinititsisimavoq, Carla Sandsip Future Greenlandeqarnerani oqalugiarnermi tamanna erseqqissaatigaa.

Sung Choi sapaatit akunneri marluk matuma siornagulli Nuummut tikippoq, taassuma amerikamiut nunanut allanut tunngasunut ministeriata Mike Pompeop tikeraarnissaralua taamaatiinnartoq piareersagassaanut suliassaanullu ilaasimavoq.

AAMMA ATUARUK USA-p aalajangersimasumik sinniisoqarfeqalerniarnera naalakkersuisut tikilluaqquaat

Amerikamiut kalaallimik suleqatitaarnissartik maannakkut sulissutigaat, taanna piffissaq tamaat Nuummi sulisartussaassaaq. Taassuma diplomati Amerikallu aallartitaqarfia Danmarkimiittoq sulinermini ikiussavai.

Sung Choilu Nuummi sulinermini allaffimminiiginnassanngitsoq, Carla Sandsip KNR-imut oqaatigaa.

- Atorfinitsinneqarmat oqarfigaara: qimussimik, qamuteralannik, timmisartumik, qulimiguulimmut umiatsiarlutillu angalasassaatit.  Kalaallit Nunaannimi sinniisorissavatsigit. Amerikamiut aallartitaat oqarpoq.

Sung Choimmi nunatsinni kulturi innuttaasullu paasisaqarfiginiartussaassavai, tamannalu qilanaarinerarpaa:

- Kalaallit Nunaanni innuttaasut ilisimasaqarfigilernissaat pingaarnertut suliassarivara. Taamaammat Nuummiiginnarnanga angalangaatsiartussaavunga.

USA Nuummi 1940-mit 1953-imut konsuuleqarfeqarpoq. Islandilu Nuummi 2013-imi konsuuleqarfimmik ammaammat Sorsunnersuup aappaata kingorna nunat allat attaveqaateqarfiannik ataavartumik aatsaat ammaaqqittoqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat