Nunanut allanut tunissat qaffariarput
Naatsorsueqqissaartarfiup kisitsisaatai nutaanerpaat naapertorlugit, Nunatsinnit avammut tunisassiat 16 procentimik 2011-mi qaffariaateqarput.
Tamanna kisitsisinngortikkaanni ukiup siulianut naleqqiullugu 346 millionit koruunit nalinginik avammut siorna tunisaqarnerusimavugut.
Avammut tunisani kinguppaat matumani suli pingaaruteqarnersaapput.
Kinguppaat avammut tunisat nalingat 258 millionit koruuninik amerleriarput, aammali qalerallit saarullillu avanmmut tunisat siuariaateqarput.
Nunatta avammut siorna tunisai katillugit 2,5 milliardit koruunit sinnilaarpaat.
Taamaattorli avataanit eqqussukkavut aamma qaffariaateqarput. Tassami 65 millionit koruunit nalinginik eqqussuinerusimavugut, procentinngorlugu 1,4 procentimik.
Matumanilu tupaallaatissaanngitsumik ikummatissat akii qaffariaateqarnerupput.
Ikummatissat assigisaallu eqqussukkavut 2011-mi ukiumut siulianut naleqqiullugu 211 millionit koruuninik qaffariaateqarput, procentinngorlugu 21,7 procentiullutik.
