Nunanut allanut tunisassiornermi akitsuutit annikillisarneqalerput

decembarip 18-at 2005 15:44

Aalisakkanik tunisassiortarnermi nunanut allanut tunisinermi akitsuutit, ukiuni tulliuttuni annikillisikkiartorneqarnissaat, Nunat tamalaat niueqatigiinnikkut suleqatigiiffiani WTO-mi ataatsimeersuarnermi eqqartorneqarput. Nunanut allanut Aningaasqarnermullu Naalakkersuisoq Josef Motzfeldt ima oqarpoq:

- Danmarkimi inuussutissalerinermut ministeri Hans Christian Schmidt oqaloqatigisimavara, EU-mit raajat eqqunneqartartut appasinnerpaamik akitsuuserneqartartut, minnerpaamik marloriaatinngortinneqarnissaanut suliniuteqarneq pillugu aamma ataatsimeeqatigisimavara. Maaniinnitsinni pissarsiaqarnerput annertuutut oqaatigisariaqarpoq, Josef Motzfeldt oqarpoq nangillunilu: - WTO-minngaanniit ukiut tulliuttut ingerlanerini nioqqutissat nunalerinermeersuungitsut aalisakkanik nioqqutissat soorlu aamma raajat pillugit akitsuutit appartinneqarnissaat WTO-mi ataatimiinnermi eqqartorneqarput. WTO-p ataatsimiinnerani isumaqatigiissutigineqalersutut isikkoqarpoq, nunat tamalaat niueqatigiinneranni akutsuutit appartikkiartuaarneqarnissaat.

Josef Motzfeldt aamma oqarpoq, nunat aningaasarsiornikkut pilimasuunngitsut innimigineqarnissaat WTO-p isumaqatigiissutaani ilaalersoq, aammalu suliniarnermi nunat pilimasuunngitsut immikkut isiginiarneqarnissaat isumaqatigiissutigineqartoq.

Taama oqarpoq Nununut Allanut

Aningaasaqarnermullu Naalakkersuisoq, Josef Motzfeldt. Nunat tamalaat niueqatigiinnikkut suleqatigiiffiata WTO-p ataatsimeersuarnerata nalaani akerliussutsimik takutitsisoqaqattaarnera pissutaalluni ippassaq Josef Motzfeldt politiinik ingiaqateqartinneqarluni hotelianut angerlaanneqartariaqarsimasoq Josef Motzfeldt oqaluttuarpoq.