Nunanut Allanut Sillimaniarnermullu ataatsimiititaliaq: Ilisimatinneqarneq ajorpugut

Nunanut allanut tunngasutigut politikkikkut nunarput nuannarineqarluarpoq. Pingaartumik piffissami kingullermi politikerit nuimasut nunatsinnut tikeraarsimasut amerlassusaat eqqarsaatigalugit.

Qaammatip siuliani Tysklandip illersornissamut ministeriata tullia dr. Nils Schmid tikeraarpoq, sapaatiummallu franskit nunanut allanut ministeriat Jean-Noël Barrot Nuummiippoq.

Inatsisartulli Nunanut Allanut Sillimaniarnermullu ataatsimiititaliaanni ilaasortat aperigaanni nunanut allanut tikeraarnerit pillugit paasissutissat annikitsuararsuupput. Tamannalu naammaginanngitsoq oqaatigineqarpoq.

- Nunanit allanit nunatsinnut soqutiginninneq annertuvoq. Juunimiilli franskit marluk tyskerlu ataaseq tikeraarput. Tikeraarnerit pillugit ilisimatinneqarneq ajorpugut tusagassiuutitigullu malinnaasariaqarluta, Pele Broberg Naleqqameersoq, Nunanut Allanut Sillimaniarnermullu Ataatsimiititaliami siulittaasup tullia oqarpoq.

- Nalunngisatuagut tassaapput tusagassiortut saqqummiussaat. Naalakkersuisut suniarnerlutik suniannginnerlutilluunniit uagitsinnut ilisimatitsineq ajorput, taamaammat nalunngisatuagut tusagassiorfitsigut apuunneqartarput.

Ataatsimiititaliaq tusagassiuutitigut taamaallaat paasissutissinneqartartoq, Pele Broberg, Nunanut allanut Sillimaniarnermullu Ataatsimiititaliami siulittaasup tullia, oqarpoq. Assi © : KNR / Markus Valentin

Naalakkersuisut pisussaaffeqanngitsut

Nunanut allanut sillimaniarnermullu ataatsimiititaliami siulittaasup Pipaluk Lyngep Inuit Ataqatigiinneersup Pele Broberg isumaqatigaa. Franskit nunanut allanut ministeriata nunatsinnukaarnera tusagassiuutitigut paasisimallugu KNR oqarpoq.

- Taamaattorli Namminersorlutik Inatsiserput naapertorlugu taamaappoq, tassa Naalakkersuisut ilisimatitsisariaqarnatillu Nunanut allanut ataatsimiititaliamiittugut tusarniaavigisariaqanngilaatigulluunniit. Inuit Ataqatigiinnili isumaqarpugut nunani allani suleqatigisatsinnik suleqateqarneq pingaaruteqartuusoq, tamannami innuttaasunut iluaqutaasariaqarmat. Taamaattumik Inatsisartunut ilaasortatut aamma tusaaneqartariaqarpugut, Pipaluk Lynge aallakaatitassiamut "Ulluni makkunani pisunit" oqarpoq.

KNR-ip Vivian Motzfeldt oqaaseqartinniaraluarpaa, ajoraluartumilli tamanna iluatsinngilaq. Nunanut Allanut Sillimaniarnermullu Ataatsimiititaliaq nunanit allanit tikeraartoqarnerit pillugit sooq ilisimatinneqarsimannginnersoq apeqqutiginiarnikuugaluarparput.