Nunanut allanut ministeriusimasut misissuivigineqartut

Danmarkimi Politiit misissueqqissaartartuisa nunanut allanut ministeriusimasut; Niels Helveg Petersen, Mogens Lykketoft aamma Per Stig Møller, unioqqutitsisumik Saddam Hussein-imut akiliuteqartarsimanernut arlaatigut akulerusimanersut massakkorpiaq misissuivigivaat, taama allaaserisaqarpoq aviisi Politiken.

Politiit misissueqqissaartartuisa Nunanut Allanut Ministereqarfimmut allakkatigut apeqquteqaataani tamanna takuneqarsinnaavoq.

Akissutigineqartut naapertorlugit politiinit paasiniarneqarpoq, Saddam Husseinip Irakimi kisermaassilluni naalakkersuisuunerata nalaani Naalagaaffiit Peqatigiit avaqqullugit, danskit suliffeqarfiutaat arlaqartut unioqqutitsisumik kiffartuussinermut akiliutinik akiliuteqartarsimanerangaanerannut ministeriusimasut qanoq sutigullu ilisimasaqarnersut.

Akissutigineqartuni uppernarsineqartunut ilaavoq, Niels Helveg Petersenip suliffeqarfik Bukkehave A/S pulaarsimagaa, suliffeqarfik taanna peqquserluuteqarluni Irakimi suliassarsiortarsimasutut pasisanut ilaavoq.