Nunanut allanut ministerit Svalbardimi ataatsimiipput
Nunat avannarliit nunanut allanut ministeriisa Svalbardimi avatangiisit silaannaallu allanngoriartornera ataatsimiissutigeqqammerpaat.
- Silaannaap allanngoriartornera avatangiisillu pillugit oqallisingaatsiarpugut. Maani Svalbardimi misissuineq aallaavigalugu oqallippugut, danskit nunanut allanut ministeri Per Stig Møller, Longyearip mittarfianiilluni mobiltelefuunikkut oqaluttuarpoq.
Svalbardimi silaannaap ozonillu allangoriartorneri malinnaaffigineqartarput.
Norgep Svalbardillu akornanni immami gasseqartorujussuunera pissutigalugu nukissioriaatsit ataatsimiinnermi aamma eqqartorneqarput. Gassip tappavaniittup ukiuni tulliuttuni 20-i 30-iniluunniit atorneqalernissaa ilimagineqarpoq.
Danskit nunanut allanut ministeriat naapertorlugu isumannaallisaanerup naalakkersuinikkut pingaaruteqalernissaa naatsorsuutigineqarpoq. Nunani avannarlerni innuttaasut aallartitaqarfinnut saaffiginnillutik ikiorneqarsinnaaniassamata ataatsimoorussamik isumaqatigiissutissat suliarineqaleruttorput.
Nunatta Svalbardillu killeqarfiisa nutaamik isumaqatigiissusiorfigineqarnissaa ministerip soqutiginerarpaa. Isumaqatigiissutissatut siunnersuut Folketingimi siullermeerlugu tallimanngorpat ataatsimiissutigineqassaaq.
