Nunanut allanut ministerit Ilulissani naapissapput

Danskit Naalakkersuisuisa nunatta Naalakkersuisui suleqatigalugit nunat Qalasersuarmut avannarlermut attuumassutillit, tassaasut Ruslandip, Norgip, Canadap, aamma USAp nunanut allanut ministerii maji naalerpat Ilulissanut qaaqquaat.
Allattoq Louise M. Kleemann
apriilip 23-at 2008 12:21

Ataatsimiinnissaq silap pissusaata allanngorneranut tunngasunik Narsami isumasioqatigiinnermi oqallisigineqartunut attuumassuteqalaartoq, Inuuteq Holm Olsen, Namminersornerullutik Oqartussani nunanut allanut Naalakkersuisoqarfimmi pisortaq oqarpoq.

-Russit siorna erfalasortik Qalasersuup avannarpiarsuani immap naqqanut inissimassuk nunalerngusaattoqaqqunagu nunat taakku tallimat nunanut allanut ministerii qaaqquneqarput.

Aamma ataatsimiinnermi erseqqisarneqassaaq nunat tamalaat akornanni atuuttunik inatsiseqareermat.

-Taakkua saniasigut aamma oqaluuserineqassaaq, silaannaap allanngorneratigut Nordvestpassage aqqutigalugu umiarsuarnik ingerlasoqartalissappat imaatigut qanoq kikkunnillu sillimasoqassanersoq, Inuuteq Holm Olsen nassuiaavoq nangipporlu.

-Ajutoortoqassagaluarpat nunat takkua akornanni suleqatigiinneq qanoq ittoq eqqumaffigineqassava. Ajunaarnersuaqassagaluarpat qanoq kikkullu qanoq iliuuseqassappat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq