Nunanut allanut ministereqarfik ulapiffiuvoq
Danmarkip nunanut allanut ministereqarfiata Iranimi aallartitaqarfitsik ippassaq unnukkut saassunneqarsimammat tassani aallartitartik ullaap tungaa oqaloqatigivaat. Dansk Folkepartiip inuusuttaasa Muuamaat ilaarlugu titartakkat videoliornerat Muuamaamik upperisallit aalassaatiginnginniassammassuk Danmarkimi nunanut allanut ministereqarfimmi ulapputtoqarpoq.
Ministereqarfimmi sulisut Kangianilu Qiterlermi immikkut ilisimasallit ullaarli ataatsimiipput. Ataatsimiinnermi danskit aallartitaat Iranimiittoq attaveqarfigineqarpoq. Tassanilu qanoriliuusissat eqqartorneqarput. Massakkut ataatsimiikkunnaareerput. Iranip Danmarkimi aallartitaa nunanut allanut ministereqarfiup aggersareerpaa, sulili takkussimanani.
Taassuma saniatigut danskit nunanut allanut ministeriata Per Stig Møllerip nunat arabiamioqarfiusuni, soorlu Syriami, Iranimi, Jordanimi, Indonisiami Pakistanimilu, nunanut allanut ministerit oqarasuaatikkut ulluni kingullerni attaveqarfigisaqattaarpai.
Maani ministereqarfimmiit nunani allani TV-eqarfiit sunik aallakaatitsinersut malinnaaffigineqarluinnarput. Muuamaat ilaarlugu titartakkat aalassatitsinerisa kingunerisaanik immikkut taamatut nakkutilliisussanik pilersitat tassa maanna nakkutilliisinneqarput, DR-ip tusagassiortua Ulla Haahr oqarpoq.
Taanna aperineqarpoq sooq danskit nunanut allanut ministeriat Danmarkimi taama tusarsaanngitsiginersoq, tusagassiortoq ima akivoq:
- Ualimut nalunaaqutaq sisamanut Per Stig Mølleri nunanut allanut ministereqarfimmit tusagassiortunik katersortitsissaaq. Nunani allani videoliat aalassatitsisimanersut taamanikkornissaanut aatsaat paasinarsissaaq. Nunani allani qanoq pisoqassanersoq massakkut naalaartoqarpoq. Paasinarseriarpallu qanoq pisoqarnersoq iliuusissat aatsaat qanorittuussanersut paasitinneqarumaarpugut, Ulla Haahr Danmarkimi nunanut allanut ministereqarfiup silataani malinnaasoq oqarpoq.
