Nunanit tamalaanit Qaqortumut timmisartuussineq siulleq akuerineqartoq

Nunanut tamalaanut timmisartoq siulleq Qaqortumi mittarfimmit Reykjavikkimut ullumi 13.45 aallassaaq.

Angallannermut aqutsisoqarfiup mittarfimmi nunanit tamalaanit timmisartuussinissamut isumannaallisaanermi malittarisassat malinneqarnerinik akuersissuteqarnerani tamanna pivoq.

Angallannermut Aqutsisoqarfik tusagassiuutinut nalunaarummi allappoq.

- Qaqortumi mittarfimmi isumannaallisaaneq misissorparput Greenland Airportsillu nunanit tamalaanit soorlu Icelandairimit tikisitsinissamut ingerlatsinermut naammattunik misilittagaqartoqarnera isumannaallisaanermilu ingerlatsinerit pisariaqartut inissaqartinneqartut uppernarsarparput, Angallannermut Aqutsisoqarfimmi pisortap tullersortaa, Lars Korsholm oqarpoq.

Nunanit tamalaanit periarfissat

Qaqortumi mittarfimmut timmisartoq ilaasoqartoq siulleq apriilip 16-ianni tikippoq.

Angallannermulli aqutsisoqarfimmit taanna akuersissut nunap iluani timmisartuussinermut akuersissummut taamaallaat tunngassuteqarluni, Air Greenlandimiillu timmisartut kisimik mittarfimmut missinnaatinneqarlutik.

Akuersissutilli nutaap kingunerisaanik nunanit tamalaanit timmisartunik mittoqarsinnaalerlunilu aallartoqarsinnaalerpoq, Air Greenland taamaalilluni mittarfimmi kisermaassiunnaarluni.

Ritzaup allaaserisaa naapertorlugu Icelandairip Qaqortumit Qaqortumiillu juunimi angallassilernissaq pilersaarutigiuaannarsimavaa.

Uanilu Københavnimit Keflavikkimiillu sapaatip akunneranut arlaleriarluni timmisartuussisoqartarnissaa pilersaarutaavoq.

Mittarfik apriilimi ammarmat mittarfiup nutaanik periarfissiinera aamma nuannaarutigineqarluarpoq.

- Angalanissaq ajornannginnerulissaaq. Nuliama ningiuata 100-liinissaanut Danmarkiliarnissarput decembarimi naatsorsuutigaarput,  aamma ajornannginnerusumik angalasalernissatsinnut qilanaarpugut, aappariit Helle Nielsen aamma Tivi Nielsen KNR-imut oqarput.