Nunanit tamalaaneersut Qassiarsummi

Avatangiisit pillugit politikkeqarnermik nunanit tamalaaneersut Qassiarsummi sapaatip akunnera ataatsimeeqatigiinnerat, nunanut allanut oqariartuuteqassanngitsoq, Gardar Foundation –ip allattaa Finn Lynge oqarpoq.

Sapaatip akunnerata ingerlanerani oqaluuserisimasat, peqataasut namminneq qanoq atorumassanerlugit aaliangissagaat Finn Lynge oqarpoq.

Pingaartillugit qulequtaritinneqarsimasut tassaapput akaarinninneq, asanninneq, atugarissaarneq attaveqaqatigiinnerlu.

Finn Lynge-p erseqqissarpaa ataatsimmeeqataasut avammut nalunaaruteqassanngitsut oqariartuuteqassanatillu. Siunertaammat Qassiarsummi qallunaatsiaat oqaluffigisimasaani, tassa Eriup Aappalaartup nuliata Tjodhilde–p oqaluffiani, sapaatip akunnerani uani ingerlanneqartumut assingusunik siunissami ingerlatsisoqartalissanersoq, Gardar foundationip siulersuisuinit nalilersorneqarnissaa.

Aamma massakkorpiaq Qassiarsummi pisut siunissami takornarianik siuarsaataasinnaanersut nalilersorneqassapput. Aammalu peqataasunut nalilersueqatigiiffiusimapput unnuisarfiit atugassarititaasullu allat pitsanngorsarneqartariaqartut.

-Nunanit tamalaaneersut periarfissikkumavagut ataatsimeeqatigiinnernut taamaattunut ilaanissaat aammalu misigisaqartilluarnerisigut eqqartorluartassammatigut, Gardar Foundation–ip allattaa Finn Lynge oqarpoq. Taamatut aaqqissuussinerni oqaluuserineqartartussat ima pingaaruteqartigissapput, oqaluuserinissannut tunngavissaqarluarlutik peqataallu inuunerannut attuumassuteqassallutik.

Norge–mit, Danmarkimit, Island-mit, Canada-mit nunatsinnillu peqataasut 25–uimasut Finn Lynge oqarpoq, tamarmillu suleqatigiilluarsimasut unnerlugit aammalu angusarissaarsimallutik qularutiginnginnerarlugu.

Qassiarsummi aqagu tuluttut, Inuktitut, Same-sut qallunaatut kalaallisullu ingerlanneqartussamik naalagiaqatigiittoqassaaq.