Nunanit piitsuneersut akerliullutik aniapput
-Nunanit piitsuneersut ataatsimeersuartitsisut aqutsisuannut Connie Hedegaardimut piumasaqaateqarput. Maannamunngooq ingerlaaseq atorneqaannarpat ataatsimiinnermi isumaqatigiinniarnermilu peqataanianngillat, Danmarks Radiop nunat allat pillugit aaqqissuisoqarfianeersoq Thomas Falbe oqaluttuarpoq.
Kyotomi ataatsimeersuarnermi isumaqatiginninniutigineqartut inaarsarneqaqqaarnissaat taakkua piumasaraat taamaanngippat isumaqatigiinniarnernut peqataaniarnatik nalunaarutigalugu.
Nunat pisuut EU-lu namminneq iliuuseqarniarnatillu nunanut piitsunut piumasaqaqattaaginnarnerat peqataaffigerusukkunnaarpaat. Nunat pisuut EU-lu CO2-mik aniatitsinermik killilersuilernissaminnik neriorsuuteqarusunnginnerat nunanulluunniit ineriartortunut silap allanngornera pillugu aningaasartuuteqarnerulernissaannut tapiissuteqarusunnginnerat qatsulluinnarpaat.
Nunanit piitsuneersut Connie Hedegaardimik ataatsimeeqateqarnertik unitsippaat, Connie Hedegaardilu nutaarsiassaateqarluni tusarliutinngippat isumaqatigiinniarnerit ingerlateqqikkumanagit.
Taamaasiornerat pissutaalluni ullap tungaani ataatsimiinissaagaluit, Connie Hedegaardip aqutsisuuffigisassai aallartinngillat, tassalu nunat piitsut Afrikameersut qanoq peqataateqqinneqalissanersut kikkut tamarmik maanna pissanngatigaat.
Nunat Afrikameersut ippassaq unnukkut periusissarsiorlutik ataatsimiikkamik nunanut pisuunut EU-mullu piumasaqaateqassallutik isumaqatigiipput, Kyotomilu isumaqatigiissummut tunngatillugu iliuuseqartoqanngippat nunamik aqutsisui ataatsimeersuarnerup naggataarneqarneranut isumaqatigiissusiorfiusussamut peqataajartornavianngitsut sioorasaarutigalugu.
