Nunanit allanit tikerartoqarnissaa Hellep ernumanartoqartippaa
Isukasiani aatsitassarsiorfimmi qalluinissamut akuersissummik tunniussisoqassappat sulisartut Kina-miit nunanillu allanit Asiameersunit suliartortut tikerarnissaat ilimanarpoq.
Aatsitassarsiorfimmi aammalu atortunik nakkulliisut Asiamiit tikisinneqarnissaat pisariaqassasoq London Mining ilimassaarivoq.
- Tamakkuninnga suliaqarsinnaasut pissarsiarinissaat ajornakusoortorujussuuvoq amerlanerit nunani allani aatsitassarsiorfinni suliffeqareermata. Aatsitassarsiorfiup ingerlanneqarnissaanut ukiunut siullernut piviusorsiortumik pilersaarusiussagutta sulisut naammattumik misilittagallit Kina-miit immaqalu Asiami nunanit allaniit tikisinnissaat pisariaqarsinnaavoq, London Mining Isukasiani aatsitassarsiorfissamut tusarniaanermut atatillugu allappoq.
London Miningimit naatsorsuutigineqarpoq sulisartut 1.500-ut 3.000-illu akornanniittut sanaartornerup nalaani pisariaqartinneqarumaartut.
Nunani allamiunut tunngasut Danmarkip naalagaaffiata oqartussaaffigai. Taamaammat ajornartorsiutaalersinnaasut Naalagaaffeqatigiit ippassaq Igalikumi ataatsimiinnerani sammineqartut ilagaat. Ataatsimiinnermi tassani Naalakkersuisut siulittaasuat Kuupik Kleist, statsminister Helle Thorning Schmidt aamma Savalimmiuni naalakkersuisut siulittaasuat Kaj Leo Johannesen peqataapput.
- Eqqartorneqartut ilagaat aatsitassarsiornermi ingerlatat annertuut pitillugit nunanit allanit suliartortut pillugit sinaakkutissiussassat, tamatumunnga pissutaalluni nunanit allanit suliartortut nuuttulluunniit pillugit apeqqut Qallunaat Nunaata suli akisussaaffigimmagu, Namminersorlutik Oqartussat nalunaarput.
Taamaattoq suli erseqqinnerusumik nalunaarutigineqanngilaq nunanit allanit suliartortut amerlinissaat qanoq Danmarkip nunattalu iliuuseqarfiniarneraat.
