Nunanit allanit soqutiginarsinnaasut

Naalagaaffiit Peqatigiit pisortaat, Kofi Annan, nunarsuarmioqatigiinnut maanna saaffiginnissuteqarpoq.

HIV-mik AIDS-imillu tunillaasarneq unitsinniarlugu suliaq annertusartariaqarpoq. Atortittartut, aanngajaarniutinik atuisartut (ikiaroorniat imminut kaportartut) aamma anguteqatiminnik atoqateqartartut pingaartumik saaffigai.

Nappaassuaq AIDS pillugu Naalagaaffiit Peqatigiit New Yorkimi ataatsimeersuarneranni Kofi Annan taama saaffiginnippoq.

Sakkutuujunngitsunik Irakimi toqoraasimaneq iliuuseqarfiginiarlugu USA-mit maanna isumaqatigiinniassutigineqarpoq. Inuinnat 24-it, arnat meeqqallu taakkununnga aamma ilaallutik, Irakimi illoqarfiit ilaanni, Habithami, siorna novembarimi toqutaapput.

Amerikamiut sakkutuui pasineqarput, kammalaatiminninnut annaasaminnut akiniutigalugit taakku toqussimagaat.

Pisoq maanna misissuivigineqareerpoq, apeqqutaalerporlu sakkutuut eqqartuussivilersuunneqassanersut.

Sudanimi nunap aggornerani Darfurimi eqqisseqatigiinniarnerugaluaq qatangiinnarpoq.

Pikitsitsisunut ilaasortat assigiinngitsut marluk atsiorumanngimmata tamanna pigallarpoq.

Sorsuttoqarnerani inuit 300.000-t toqutaareerput millionilippassuit qimarrassimasut.