Nunanit allanit naatsut
Silaannaap allanngoriartornerata unikaallatsitsinneqarnissaanut suliniuteqarnissamut pilersaarutinik, Tuluit Nunaanni naalakkersuisut ippassaq saqqummiussipput.
Tamaakkaluartoq silaannaap kissakkiartorneranut unikaallatsitsinissamut tuluit suliniutissaasa piviusunngortinneqarsinnaanissaat qularnarinarpoq.
Anguniakkat piviusunngortinneqassappata Tuluit Nunaata silaannarmut gassimik ipinartortalimmik ukiuni tulliuttuni sisamani aniatitsinera 18 procentit angullugit annikillisinneqartariaqarpoq, tassa silaannaap 1990-ip siornatulli minguitsigilernissaa anguniarneqarpoq.
-Anguniakkat piviusunngussappata Tuluit Nunaanni suliffeqarfissuit arlallit aningaasarsiornikkut eqqugaassapput. Nunarsuarmi uulia akitsormat aamarsuarnik atuinerulernikuuvugut, tamannalu pissutigalugu gassimik ipinartortalimmik silaannarmut aniatitsinerulersimavugut, Tuluit avatangiisinut ministeriat Margeret Beckett taama oqarpoq.
Silaannap kissakkiartorneranut unikaallatsitsinissaq pillugu Kyotomi isumaqatigiissutip piumasaqaataanik, tassa ukioq 2012-utinnagu gassimik toqunartortalimmik aniatsitsinerup 12,5 procentimik annikillisinneqarnissaanik Tuluit eqquutsitsisinnaassasut, Tuluit naalakkersuisui erseqqissaapput.
Silaannarmik mingutsitsineq akiorniarlugu iliuuseqaqatigiinnissaq pillugu nunat tamalaat New Zealandimi ulluni makkunani ataatsimeeqatigiinneranni, Tuluit ministeriunerat Tony Blair peqataavoq.
