Nunanit allaneersut ikilisinniarneqarput
Nuummiinnaq ukiut tamaasa nunani allaneersut 150-it missaanniittut sulisinnaanermut akuersissutinik tunineqartarput. Sulisinnaanissamut akuersissutit amerlassusaasa ukiuni aggersuni ikilisinneqarnissaat Namminersornerullutik Oqartussanit neriuutigineqarpoq.
Inatsisitigut allannguinikkut suliffeqarfiit pinngitsaalineqassapput avataanit tikisitap ataatsip kalaallimik ataatsimik ilinniartitsilluni taartissaqartitsisalernikkut, pingaartumillu sanaartornerup iluani neriniartarfinnilu atorfillit akornanni sulisoqarniarnermut allannguut sunniuteqartussaavoq.
Pilersaarut iluatsissappat kalaallit arlallit soorlu Poleniminngaaneersunut, Rumaaniaminngaaneersunut Canadaminngaaneersunulluunniit unammillersinnaanngussapput.
Inuutissarsiornermut Naalakkersuisoq Johan Lund Olsen ilaatigut ima oqarpoq:
- Taamaalillutaana tassa avataaniit suliartortartut, siunissaq ungasinnerusoq isigalugu, taakkua ikilisarniarigut.