Nunanit allamiunut oqartussaaffik Naalakkersuisut tigorusukkaat
Nunanit allamiunut oqartussaaffiup ukiuni tullerni sisamani nunatsinnit oqartussaaffigineqalernissaa Naalakkersuisuinit anguniarneqarpoq.
Udenlandske ufaglærte arbejdere arbejder primært i servicesektoren i Grønland.
Allattoq Hagen Højer Christensen
decembarip 16-at 2014 07:28
Nutserisoq Simon Uldum -
- Piffissami Naalakkersuisooqatigiinnerup ingerlanerani nunanit allamiunut oqartussaaffik nunatsinnit tiguneqassaaq, Siumup, Demokraatit Atassutillu naalakkersuisooqatigiinnissamik isumaqatigiissutaanni taama allassimavoq. Inuussutissalerinermut oqartussaaffiup aammalu silaannakkut angallannermut oqartussaaffiup ukioq 2018 nallertinnagu tiguneqarnissaat isumaqatigiissummi aamma atuarneqarsinnaavoq.
Ulrik Pram Gadip, Københavnip Universitetiani Naalagaaffimmi aqutsineq pillugu ilisimatusarfimmi post. doc.-iusup, ilaatigullu Danmarkip Kalaallit Nunaatalu akornanni pissutsinik ilisimatusartuusup, nunanit allamiunut oqartussaaffiup tiguniarnissaa Kalaallit Nunaanni politikkikkut annertuumik isiginiarneqarnasoraa.
- Suliniutinut angisuunut inatsit taamaallaat pineqanngilaq, aammali sulisartut allamiut ilinniarsimanngitsut kalaallinit suliffissaaleqisunit suliffissanik arsaartuisut pillugit oqallinneq pineqarpoq - soorlu maani Danmarkimi Europap kangiamiut tikittartut pillugit oqallittoqartoq. Kalaallit Nunaannili kangiamiut tikittartut pineqarnerupput, taakkulu ilaatigut akunnittarfinni kiffartuussivinnilu sulisorineqartarput, Ulrik Pram Gad aviisimut Berlingske Tidendemut oqarpoq.
AAMMA ATUARUK Johan Lund Olsen: Nunasinianut inatsit inuppalaarnerussaaq
Kalaallit Nunaatali nunanit allamiunut inatsisiliornerup, inuussutissalerinerup aamma silaannakkut angallanneq pillugu oqartussaaffiit ukiut sisamat tulliuttut ingerlanerini tigusinissaa piviusorsiortuunersoq apeqqutaassaaq, nunap aningaasaqarnera pitsaanngitsumik inissisimammat.
Nunatta aningaasaqarnera apeqqutaatikkaa
Inuit Ataqatigiit siulittaasuat, Sara Olsvig, naapertorlugu oqartussaaffinnik tigusisoqartinnagu tamanna nunatta aningaasaqarneranut qanoq unammillernartigissanersoq paasissallugu pingaaruteqarluinnarpoq.
- Oqartussaaffimmik tigusinnginnitsinni aningaasaqarnerup pitsaasuunissaa qulakkeeqqaassallugu pingaruteqarnerpaavoq, danskimmi naalagaaffiannit aningaasanik malitseqarnavianngimmat. Nunatsinni suliniutinik angisuunik aallartitsisoqarnissaa ilimanaateqalerpat nunanit allamiut pillugit oqartussaaffiup tigunissaa pissusissamisuussaaq, aningaasaqarnerpulli tatineqarsimatillugu tamanna qularutigigallarpara, Sara Olsvig aviisimut Berlingskemut taama oqarpoq. Aviisip Naalakkersuisut oqaaseqartinniarsimagaluarpai iluatsinnaguli.
