Nunanik issittunik sammisaqartariaqarput
Ingeniørinngorniat nunarsuarmi sumi tamaneersut ilinniarnerminni semesterimi ataatsimi nunanik issittunik sammisaqarnissamut periarfissinneqartariaqarput. Qaasuitsumi Teknologimik Inerisaaviup Sisimiuniittup ilaatigut tamanna anguniagaraa. Teknologimik inerisaavik ukiut tallimat ingerlareerpoq, mannalu tikillugu issittumi sanaartornermi ingeniørinik arlalinnik soraarummeertoqareerpoq.
Kisianni siunissami ilinniarneq sanaartornermi ingeniørinngorniarnermut kisimi tunngasariaqanngitsoq pisortaq oqarpoq:
Sanaartornermi ingeniørinngorniarneq ajunngilluinnarpoq, taamaattorli aamma ajussanngikkaluaqaaq ilinniarneqarsinnaappata avatangiisinut tunngasut imaluunniit nukissiuuteqarnermut tunngasut imaluunniit inuiaqatigiinnut kalaallinut pingaarutillit allat.
Tamakkualu piviusunngortinniarnissaannut piumassuseqartoqarpoq, taama oqarpoq ilisimatooq Arne Villumsen Qaasuitsumi Teknologimik Inerisaavimmi pisortaasoq, aamma Artekimik taaneqartartumi. Taassuma kalaallit folketingimut ilaasortat ilinniarnerup Danmarkimi ingerlanneqartarfianut DTU-mut aggersarsimavai. Pulaartitsinermi ilaatigut siunertarineqarpoq ilinniarfiup ingerlanneqarneranut ukiumut 2,8 millioni koruunit atorneqartartut amerlisinniarnissaannut naalakkersuinikkut tapersersortissarsiorneq.
Pulaartitsinermi aamma siunertarineqarpoq anguniakkanik oqaluttuussinissaq, ilaatigut oqaluttuarineqarluni ilinniarnerup nunat tamat akornanneersunit ingerlanneqarsinnaasunngortinnissaa. Assersuutigalugu semesteri ataaseq nunani allamiunut neqeroorutigineqarsinnaasunngorlugu. Taama pisoqassappat semesterimi tassani tuluit oqaasii atorneqartariaqassapput tamannaavorlu Arne Villumsenip ernummatigisatuaa:
- Ernummatigaara atuartitsineq tuluttuinnaq semesterimi tassani ingerlakkutsigu kalaallinit ilinniartunit malinnaaniapiloorfigineqassasoq taamalu ilinniarnermik unitsitsiinnartoqarnissaa ilimagineqarsinnaalluni. Taamaattorli oqarfigineqarpunga tamakku ernummatigisariaqanngikkikka kalaallit ilinniartut piginnaaneqarluarmata, Arne Villumsen oqarpoq.
Villumsen aamma oqarpoq, semesterip nunanit tamalaanit peqataaffigineqarsinnaasup piareersaatitut sammisatut ingerlanneqarsinnaanissaa anguniarlugu Nunafondimut tapiiffigeqqulluni qinnuteqarniarluni. Taamaattumik IA-p Folketingimut ilaasortaatitaata, Kuupik Kleistip, DTU-mut pulaaqataanera naleqquppoq, tassami Kuupik Kleist Nunafondimi ullumimiit siulittaasunngormat.
