Nunanik allanik isumaqatigiissuteqarsinnaaneq inatsiseqalerpoq
Inatsisartut ippassaq akuersissutigaat inatsit nunatta naalagaaffiit akornanni inatsisitigut pisinnaatitaaffiit pisussaaffiillu pillugit isumaqatigiissuteqartarnissaanut tunngasoq.
Namminersornerullutik Oqartussat akisussaaffiit Danmarkimit tigoriikkatik, soorlu peqqinnissaqarfik, ilinniartitaaneq akileraartarnermullu atatillugu nunanik allanik isumaqatigiissuteqarnissaat inatsisikkut periarfissinneqarpoq.
Nunatta Savalimmiormiunik peqateqarluni suleqateqarluniluunniit nunanik allanik isumaqatigiissuteqarsinnaanera atuutsinneqassanngitsoq inatsisip erseqqissarpaa.
Tassani nunatta savalimmiormiut qulaatiinnarlugit isumaqatigiissuteqarsinnaatitaannginnissaa taamaalilluni aalajangersaavigineqarpoq.
Illuatungaanilu nunarput Savalimmiullu peqatigiillutik nunanik allanik isumaqatigiinniaqateqassagunik assigiimmik ingerlasoqarnissaa inatsisikkut taamaasilluni aamma qularnaarneqarpoq.
Isumaqatigiinniarnerni taamaattuni nunatsinni Savalimmiunilu naalakkersuisut tamarmik akuerseqqaarsimassapput isumaqatigiissut atuutsinneqassappat.
Inatsisittaaq qularnaarpaa illersornissaq sillimanissarlu eqqarsaatigalugit nunatta nammineerluni Dansket akuersiteqqaarnagit isumaqatigiissuteqartannginnissaa, apeqqutit tamakku Danmarkip naalagaaffittut akisussaaffigimmagit. Inatsit Inatsisartuni ippassaq akuersissutigineqartoq Folketingip kingusinnerusukkut suliarissavaa.
