Nunani avannarlerni suleqatigiinneq naligiinnerulissasoq
Naqqiissut: Nunat Avannarliit Siunnersuisoqatigiivisa ataatsimiititaliaq pilersikkaat ilanngutassiami siusinnerusukkut allassimavoq. Tamanna eqqortuunngilaq, Nunat Avannarliit Ministeriisa Siunnersuisoqatigiivi ataatsimiititaliamik pilersitsisuupput. KNR-ip ilanngutassiaq naqqiissuteqarfigaa, kukkunerlu ajuusaarutigaa.
Nunat Avannarliit Ministeriisa Siunnersuisoqatigiivisa ataatsimiititaliaq Helsingforsimi isumaqatigiissummik nutarterinissamut siunnersuusiortussaq marsip 16-ianni pilersippaat.
Isumaqatigiissut 1962-imeersoq Danmarkip, Finlandip, Norgep, Sverigellu suleqatigiinnerannut tunngaviliillunilu Nunat Avannarliit Siunnersuisoqatigiit aamma Nunat Avannarliit Ministeriisa Siunnersuisoqatigiivinut sinaakkusiivoq.
Ataatsimiititaliap Savalimmiut, Kalaallit Nunaata Ålandillu Nunat Avannarliit Siunnersuisoqatigiivini aamma Nunat Avannarliit Ministeriisa Siunnersuisoqatigiivini naligiittut peqataasarnissaannik qulakkeerinissaa anguniagaasoq, Nunat Avannarliit Ministeriisa Siunnersuisoqatigiivi tusagassiuutinut nalunaarummi paasissutissiipput.
Naligiittut suleqataasut
Nutarterinermi namminersorlutik oqartussat pingasut sunniuteqarnerulernissaannut aalajangersimasumik allannguutissatut siunnersuuteqartoqassaaq.
Kalaallit Nunaata, Savalimmiut Ålandillu nunat avannarliit suleqatigiinneranni naligiinnerusumik atuuffeqarnissartik kissaatigiuarlugulu pissutsit taamaaginnarnerat naammagisimaarnagu oqariartuutiginikuuaat.
Ataatsimiititaliap Nunat Avannarliit Ministeriisa Siunnersuisoqatigiivini aamma Nunat Avannarliit Siunnersuisoqatigiivini siulittaasuuffimminnut atatillugu pisussaaffitik aamma Ministerit Siunnersuisoqatigiivisa ataatsimut missingersuutaannut aningaasatigut tapiissutitik ilaatigut nalilersussavai.
Ataatsimiititaliaq nunani avannarlernit aamma namminersorlutik oqartussaaffeqartunit tamanit arfineq-pingasunik peqataaffigineqarpoq.
Danmarkip 2026-imi sulineq siuttuuffigaa, tassungalu atatillugu Savalimmiut peqatigalugu Nunat Avannarliit Ministeriisa Siunnersuisoqatigiivini ataatsimut siulittaasuuffeqarlutik.
Åbo Akademimi inatsisilerinermut professori, Eline Pirjatanniemi ataatsimiititaliameeqataavoq.
Taassuma Helsingforsimi isumaqatigiissutip nutarterneqarnissaani inatsisitigut kingunissat ataatsimiititaliamik pilersitsisoqarnissaanik aalajangiinermut tunngaviusup qulaajaaffigineqarnera siusinnerusukkut siuttuuffigaa.
Sivisuumik suliarineqartoq
Nunat Avannarliit Siunnersuisoqatigiivisa nunat avannarliit naalakkersuisui Helsingforsimi isumaqatigiissummik, kingullermik 1995-imi allanngortinneqartumik nutarternissaannik 2024-mi oktobarimi innersuussuteqarfigaat.
Naalakkersuisut nutarterisinnaanissaq sioqqullugu inatsisitigut qulaajaasoqaqqaarnissaa 2025-mi februaarip aqqarnanni aalajangerpaat.
Professori Pirjatanniemi suliassamut 2025-mi apriilip sisamaanni toqqarneqarpoq, qulaajaanerlu 2026-mi februaarip aallartinnerani tunniunneqarpoq.
Nunani avannarlerni ministerit suleqatigiit ataatsimiititaliamik Kalaallit Nunaata, Savalimmiut Ålandillu suleqatigiinnermi naligiimmik qanoq ilillutik peqataalernissaannik siunnersuuteqartussamik pilersitsiniarlutik maanna aalajangerpaat.
Suliaqarneq piffissaalluartukkut ataatsimut nalunaarusiornermik naammassineqarnissaa naatsorsuutigineqarpoq, allannguutissatut siunnersuut taamaalilluni Nunat Avannarliit Siunnersuisoqatigiivisa oktobarimi ataatsimiinneranni suliarineqarsinnaassammat.
