Nunani Avannarlerni Siunnersuisoqatigiit Issittoq pillugu ataatsimut pilersaarusiorumapput

- Issittumi politikkip akunnitsinni ataqatigiissaarnissaanik ullumi isumaqatigiissuterput pingaaruteqaqaaq. Nunammi avannarliit issittumut tunngatillugu tamarmik immikkut periaaseqarput pilersaaruteqarlutillu, tamakkuli tamarmik ataqatigiissaarneqarnissaat maanna suliniutigilerparput. Nunani avannarlerni naalakkersuisut ataatsimiittariaqarput issittumullu tunngasunik pilersaarutitik saqqummiuteriarlugit assigiissarlugit. Arlaatigummi aaqqiagiinngissuteqartoqalissagaluarpat, ataatsimoorullugit isumaqatigiissutigeriikkavut aallaavigalugit apeqqutit pingaarutillit siunissami aaqqivigineqarsinnaassammata.

Nunat avannarliit siunnersuisoqatigiivini siulittaasoq Finlandimiu Kimmo Sasi issittoq pillugu sammisaqartitsineq naammassineqareersorlu taama oqarpoq. Nunat Avannarliit siunnersuisoqatigiivisa siunnersuusiaat nunat avannarliit naalakkersuisuinut maanna ingerlateqqinneqarput. Ilaatigut issittumi immami isumannaallisaanissamut, aatsitassanillu piiaanermut tunngassutilinnik inatsisinik pituttuisunik pilersitsisoqanialersillugu Nunat Avannarliit siunnersuisoqatigiivi siulliullutik siunnersuusiortalernissaat taamaaliornikkut anguniarneqarpoq.

- Nunani avannarlerni nunat inoqqaavisa avatangiisaasalu akornutiginngisaanik uuliamik gassimillu akisussaaffilimmik qalluisoqartarnissaanik isummamut uagut maligassiuisuussaagut, Kimmo Sasi oqarpoq.

Nunat avannarliit siunnersuisoqatigiivisa issittumut politikkimut taama akuliunnerat Issittumi Siunnersuisoqatigiit suliassaannut akulerunniarnertut paasineqassanngilaq, nunat avannarliilli Issittumi Siunnersuisoqatigiivini ataatsimoornerulluni periaaseqarnissamut aqqutissatut paasineqassasoq, Kimmo Sasip erseqqissarpaa:

- Taama immikkut sammisaqartitsilluni ataatsimiinnermi Issittumi akisussaaffeqartumik ineriartortitsinissami nunat avannarliit siuttunngornissaat anguniarneqarpoq, Kimmo Sasi oqarpoq.

Ullumi taama sammisaqarneq Nunat Avannarliit siunnersuisoqatigiivisa perngaammik ingerlappaat, tassalu nunani avannarlerni naalakkersuinikkut suliallit Islandip inatsisartuini katersuutsinneqarnerat aamma perngaammik ingerlanneqarluni.

Issittoq pillugu ullumi katersuutsitsisoqarmat siunnersuutit arfineq marluk Nunat avannarliit siunnersuisoqatigiivisa akuersissutigaat.

Nunat avannarliit ataatsimoorussaminnik Issittumut tunngasunik suleriusissaanut isumaqatigiissutip saniatigut imaani isumannaallisaanermut akisussaaffeqarnerulernissartik isumaqatigiissutigaat. Issittullu imartaani upalungaarsimanermut nunat avannarliit ataatsimoorussaanik aningaasartuutissaasa isumaqatigiissutiginissaat maanna piffissanngortoq, Nunat avannarliit siunnersuisoqatigiivisa oqaatigaat,  takornariartaassuarnillu annaassiniaratarsinnaanerit akissaqartilerumallugit akileraaruteqarnerusalernissaat aaqqiissutaasinnaasorineqarluni.

Aamma nunat avannarlerni naalakkersuisut uuliasiorfiutileqatigiinnut piumasaqaateqarnerulernissaat Nunat avannarliit siunnersuisoqatigiivisa siunnersuutigaat. Uuliasiorfiutileqatigiimmi periaatsit nutaaliaanerpaat isumannannginnerpaallu atornissaanik neriorsuisarneri naammanngillat. Tassalu inatsisitigut pituttuisunik isumaqatigiissusiorneqartarnissaat aqqutissaasorinarluni, Nunat avannarliit siunnersuisoqatigiivi taama isumaqarput, tassalu uuliasiorfiutileqatigiit uuliaarluissagaluarpata namminneq saliinissaminnut inatsisitigut pituttuisumik pisussaaffilerneqartarnissaat siunnersuutigineqarlunittaaq.

Tamatuma saniatigut issittumi atugarissaarnerulernissamut suliniutissanut tunngasunut, nunat inoqqaavisa pisinnaatitaaffiinut, oqaasiinut, ilinniartitaanerinut kiisalu ilisimatusarnermut tunngasutilinnik siunnersuusiortoqarnissaa Nunat avannarliit siunnersuisoqatigivisa akueraat.