Nunani Avannarlerni ministeriunerit orpippassuarni ataatsimiipput

Silaannaap allanngoriartornera kissatsikkiartorneralu Nunani Avannarlermi ministeriunerit Finlandimi orpippassuit akornanni ullumi oqaluuseraat, tassa aasaanerani ataatsimiinnerminni pingaarnertut taanna oqaluuserisussaasimagamikku, nutaarsiassaqartitsivik Ritzau taama allaaserisaqarpoq.

Nukissiuutit pillugit suleqatigiinnerulernissaq ministeriunerit anguniarniarpaat, tassami gassit silaannarmik kissakkiartuaartitsisartut aniatitsinerisa annikillisarneqarnissaanni Nunat Avannarliit siuttuuniarlutik isumaqatigiinnikuummata.

Nunat killeqarfii Nunani Avannarlerni ministeriunerit aamma oqaluuseraat. Sverigimi ministeriuneq, Fredrik Reinfeldt tikkuaavoq, nunani avannarlermiunik aatsaat taama nuttartoqartigisalersoq, tassa nunagisamik taarsiisoqakulatigilersoq, passinillu isissutissanik peqarnissaq pisariaarutereeraluartoq ersinngitsunillusoooq akornutissaqartoqartarpoq, soorlu akileraartarnermut tunngasut, aamma inunnik isumaginninnermut tunngasut, tamakkulu ajornartorsiutaasinnaapput.

Nunani Avannarlernut angalassatilluni passeqartariaqannginneq Danmarkimit iluarisimaarneqarluinnartoq, ministeriunerup Anders Fogh Rasmussenip aamma uppernarsarpaa, tamannalu Dansk Folkepartiimit allanngortinneqassanngilluinnartoq aamma oqarpoq.

Sverigimi ministeriunerup tamanna tusassallugu iluarilluinnarpaa.

- Qujanarmi taama oqartoqarmat, dansk Folkepartiimmi Sverige uparuartortarpaa, Fredrik Reinfeldt oqarpoq.